Ekobazar – áleýmettik mańyzy bar azyq-túlik taýarlary baǵasyn turaqtandyrýǵa baǵyttalǵan. Jáne óndirýshilerdiń ónimderin deldalsyz tikelei satý júiesin qalyptastyrady. Sonymen birge, ekobazar – týrizmdi damytýǵa baǵyttalǵan jol. Óitkeni avtovokzal janynda, halyqaralyq áýejaiǵa barar jolda ornalasqan saýda kesheninde Túrkistan óńiriniń barlyq ónimderi usynylady.
Merekelik jármeńkege 50-ge jýyq taýar óndirýshiniń 411 tonnadan astam aýyl sharýashylyǵy ónimderi bazar narqynan 15-20 %-ǵa tómen baǵada usynyldy. Atap aitsaq, 55 tonna et pen et ónimderi, 148 tonna kókónis jáne ózge de taýarlar ákelingen.
Naýryz merekesi Túrkistandaǵy «Jibek joly» saiabaǵynda da uiymdastyryldy. Munda qazaq mádenieti men rýhaniiatynan syr shertetin is-sharalar ótkizildi. Eńseli kiiz úiler tigilip, qolóner sheberleriniń kórmesi ótip, qazaqtyń ánderi shyrqaldy. Ulttyq sport túrleri nasihattalyp, oiyndar oinaldy. Óńirdiń estrada juldyzdarynyń kontserttik baǵdarlamasy usynylyp, naýryz jyrlary jyrlandy. Naýryz kóje taratyldy. Ómirzaq Shókeev jurtshylyqty merekemen quttyqtap, tarihi Túrkistannyń keleshegi jarqyn bolaryna senimdi ekenin jetkizdi.
– Qadirli Alash jurty! Qurmetti túrkistandyqtar! Sizderdi Ulystyń uly kúni – Naýryz merekesimen shyn júrekten quttyqtaimyn! Shejirege toly Túrkistan oblysynyń qonaqjai jáne eńbekqor, birligi jarasqan halqy jyldy tolaiym tabystarmen qarsy alyp otyr. Oblystyń infraqurylymyn jaqsartý, eldiń áleýetin kóterý baǵytynda júieli jumys atqarylyp keledi. Túrki áleminiń ortalyǵy – Túrkistan qalasy jańa keiipke endi. Úsh jyldan astam ýaqyt ishinde Túrkistannyń infraqurylymy qalanyp, turǵyn úiler salyndy, halyq igiligine qyzmet etetin ǵimarattar sany kúrt artty. Óńirde «Jasyl beldeý» aýmaǵy ulǵaiyp, sý qoimalar salyndy. Barshańyzdy Ulystyń uly kúnimen quttyqtai otyryp, otbasylaryńyzǵa amandyq, árbir bastamalaryńyzǵa sáttilik tileimin, – dedi Ómirzaq Shókeev.
Osy is-sharada óńir basshysy Túrkistandaǵy uly merekege respýblikalyq jáne óńirlik BAQ ókilderine suhbat berdi. Úsh jyldan astam ýaqyt ishinde júzege asqan jobalarǵa toqtalyp, Jańa Qazaqstandy qurý baǵytyndaǵy betburystardy baiandady. Memleket basshysy Qasym-Jomart Toqaevtyń qoldaýymen Túrkistandy Túrki áleminiń ortalyǵyna ainaldyrý jumystary jalǵasyp jatqanyn málimdedi.
