تۇركىستان جۇرتشىلىعى مەن قوناقتارى ءۇشىن قازاقستاندا تەڭدەسى جوق ەكوبازار اشىلىپ، ازىق-تۇلىك ونىمدەرىنىڭ جارمەڭكەسى ءوتتى.  وندا تۇركىستان ءوڭىرىنىڭ اۋىل شارۋاشىلىعى ەڭبەككەرلەرى مەن تاۋار وندىرۋشىلەرىنىڭ ونىمدەرى ۇسىنىلدى. بەرەكەلى جارمەڭكەگە تۇركىستان وبلىسىنىڭ اكىمى ءومىرزاق شوكەيەۆ ارنايى قاتىستى.

ەكوبازار – الەۋمەتتىك ماڭىزى بار ازىق-تۇلىك تاۋارلارى باعاسىن تۇراقتاندىرۋعا باعىتتالعان. جانە وندىرۋشىلەردىڭ ونىمدەرىن دەلدالسىز تىكەلەي ساتۋ جۇيەسىن قالىپتاستىرادى. سونىمەن بىرگە، ەكوبازار – ءتۋريزمدى دامىتۋعا باعىتتالعان جول. ويتكەنى اۆتوۆوكزال جانىندا، حالىقارالىق اۋەجايعا بارار جولدا ورنالاسقان ساۋدا كەشەنىندە تۇركىستان ءوڭىرىنىڭ بارلىق ونىمدەرى ۇسىنىلادى.

مەرەكەلىك جارمەڭكەگە 50-گە جۋىق تاۋار ءوندىرۋشىنىڭ 411 توننادان استام اۋىل شارۋاشىلىعى ونىمدەرى بازار نارقىنان  15-20 %-عا  تومەن باعادا ۇسىنىلدى. اتاپ ايتساق، 55 توننا ەت پەن ەت ونىمدەرى، 148 توننا كوكونىس جانە وزگە دە تاۋارلار اكەلىنگەن.

ناۋرىز مەرەكەسى تۇركىستانداعى  «جىبەك جولى» ساياباعىندا دا ۇيىمداستىرىلدى. مۇندا قازاق مادەنيەتى مەن رۋحانياتىنان سىر شەرتەتىن ءىس-شارالار وتكىزىلدى.  ەڭسەلى كيىز ۇيلەر تىگىلىپ،  قولونەر شەبەرلەرىنىڭ كورمەسى ءوتىپ، قازاقتىڭ اندەرى شىرقالدى. ۇلتتىق سپورت تۇرلەرى ناسيحاتتالىپ، ويىندار وينالدى. ءوڭىردىڭ ەسترادا جۇلدىزدارىنىڭ كونسەرتتىك باعدارلاماسى ۇسىنىلىپ، ناۋرىز جىرلارى جىرلاندى. ناۋرىز كوجە تاراتىلدى. ءومىرزاق شوكەيەۆ جۇرتشىلىقتى مەرەكەمەن قۇتتىقتاپ،  تاريحي تۇركىستاننىڭ كەلەشەگى جارقىن بولارىنا سەنىمدى ەكەنىن جەتكىزدى.



– ءقادىرلى الاش جۇرتى! قۇرمەتتى تۇركىستاندىقتار! سىزدەردى ۇلىستىڭ ۇلى كۇنى – ناۋرىز مەرەكەسىمەن شىن جۇرەكتەن قۇتتىقتايمىن!  شەجىرەگە تولى تۇركىستان وبلىسىنىڭ قوناقجاي جانە ەڭبەكقور، بىرلىگى جاراسقان حالقى جىلدى تولايىم تابىستارمەن قارسى الىپ وتىر. وبلىستىڭ ينفراقۇرىلىمىن جاقسارتۋ، ەلدىڭ الەۋەتىن كوتەرۋ باعىتىندا جۇيەلى جۇمىس اتقارىلىپ كەلەدى. تۇركى الەمىنىڭ ورتالىعى – تۇركىستان قالاسى جاڭا كەيىپكە ەندى. ءۇش جىلدان استام ۋاقىت ىشىندە تۇركىستاننىڭ ينفراقۇرىلىمى قالانىپ، تۇرعىن ۇيلەر سالىندى، حالىق يگىلىگىنە قىزمەت ەتەتىن عيماراتتار سانى كۇرت ارتتى. وڭىردە «جاسىل بەلدەۋ» اۋماعى ۇلعايىپ، سۋ قويمالار سالىندى. بارشاڭىزدى ۇلىستىڭ ۇلى كۇنىمەن قۇتتىقتاي وتىرىپ، وتباسىلارىڭىزعا اماندىق، ءاربىر باستامالارىڭىزعا ساتتىلىك تىلەيمىن، – دەدى ءومىرزاق شوكەيەۆ.

وسى ءىس-شارادا ءوڭىر باسشىسى تۇركىستانداعى ۇلى مەرەكەگە رەسپۋبليكالىق جانە وڭىرلىك ب ا ق وكىلدەرىنە سۇحبات بەردى.  ءۇش جىلدان استام ۋاقىت ىشىندە جۇزەگە اسقان جوبالارعا توقتالىپ،  جاڭا قازاقستاندى قۇرۋ باعىتىنداعى بەتبۇرىستاردى باياندادى. مەملەكەت باسشىسى قاسىم-جومارت توقايەۆتىڭ قولداۋىمەن تۇركىستاندى تۇركى الەمىنىڭ ورتالىعىنا اينالدىرۋ جۇمىستارى جالعاسىپ جاتقانىن مالىمدەدى.