Túrkistanda eki jylda myńǵa jýyq azamat baspanamen qamtyldy
Túrkistan oblysynda byltyrǵy jyl men biylǵy jyldyń esepti kezińine deiin 1 myńǵa jýyq azamat baspanamen qamtyldy. Qazirgi tańda oblys boiynsha 42 883 adam turǵyn úi kezeginde tur. Bul týraly brifingte oblystyq energetika jáne turǵyn úi-kommýnaldyq sharýashylyq basqarmasynyń bólim basshysy Baqtybek Ýbaidin málimdedi, – dep habarlaidy Dalanews.kz.
Onyń aitýysha, baspana kezeginde turǵandardyń basym bóligi halyqtyń áleýmettik jaǵynan osal toptaryna jatatyn azamattar.
– Qazirgi tańda, bir ǵana Túrkistan qalasynyń ózinde memlekettik turǵyn úi qorynan baspana alýǵa 13 010 adam kezekte tur. Onyń ishinde 3 258-i kópbalaly otbasylar, 5 565-i halyqtyń áleýmettik osal toptary, 4001-i biýdjettik uiymdardyń qyzmetkerleri, 185-i jetim balalar men ata-anasynyń qamqorlyǵynsyz qalǵan balalar jáne 1-i baspanasy avariialyq jaǵdaida dep tanylǵan azamat. Zań talaptaryna sai osy atalǵan azamattardy úimen qamtamasyz etý jumystary júrgizilip keledi, – dedi B.Toqbergenuly.
Sondai-aq, óz kezeginde «Otbasy bank» Túrkistan oblysy boiynsha filialy direktorynyń orynbasary Ámir Nurmuqanov úi kezeginde turǵan azamattarǵa memlekettik baǵdarlamanyń sharapaty kóptep tiip jatqanyn sóz etti.
– Óńirde «Otbasy banki» arqyly jylyna 2 paiyzdyq jeńildetilgen nesiemen úi alý úshin kópbalaly, tolyq emes otbasylar men múgedek balalardy tárbielep otyrǵan otbasylar úshin «Baqytty otbasy» baǵdarlamasy iske asyrylýda. Biyldyń ózinde atalǵan joba boiynsha 1 269 otbasy ótinish bildirdi. Al, úi kezeginde turǵan azamattardyń qalǵan sanattary úshin «5-10-25» baǵdarlamasy jumys isteidi. Máselen, ótken jyly osy jobamen oblys ortalyǵynda 336 páter satyldy. Biyldyń ózinde 66 páterge konkýrs jariialandy, nátijeleri maýsym aiynda anyqtalady. Sonymen qatar, Túrkistan qalasynda turǵyn úi «7-20-25» baǵdarlamasymen 63 otbasy turǵyn úi satyp alsa, 9 páter boiynsha qaita konkýrs jariialandy, – dedi A.Qizatuly.
Aita keteiik, memlekettik jáne biýdjettik qyzmetkerlerdi turǵyn úimen qamtamasyz etý boiynsha júrgizilgen jumystyń nátijesinde ótken jyly 336 páter, biyl 125 páter úlestirilgen. Sondai-aq, osy jyly óńirde kommýnaldyq turǵyn úige kezekte turǵan 137 azamat turǵyn úimen qamtamasyz etildi.
