Túrkistan qalasynda «Túrkistan maqamdary» atty oqý-ádistemelik semınary ótti. «Rýhanı jańǵyrý» baǵdarlamasyn dáripteýdi kózdeıtin sharany Túrkistan oblystyq mádenıet basqarmasy men halyq shyǵarmashylyǵy ortalyǵy uıymdastyrdy, – dep habarlaıdy Dalanews.kz Túrkistan oblysynyń Óńirlik komýnıkasıalar qyzmetine silteme jasap.

Ashylý saltanatynda «Nur Otan» partıasy Túrkistan oblystyq fılıaly tóraǵasynyń birinshi orynbasary Beısen Tájibaev tól ónerdi ulyqtap júrgen dástúrli ánshiler semınaryna qatysýshylarǵa sáttilik tiledi.   Sondaı-aq, oblystyq mádenıet basqarmasynyń basshysy Ázimhan Qoılybaev sharanyń negizgi maqsatyn túsindirip, mańyzdylyǵyna keńinen toqtaldy.

Eki kúnge josparlanǵan semınar arnaıy ádistemelik baǵdarlamaǵa saı ótkizildi.  Negizgi maqsat – ońtústiktiń dástúrli oryndaý mektebin ıaǵnı terme, kúılerin óskeleń urpaqqa keńinen dáriptep, tájirıbe almasý, oblys kóleminde óńirlik mýzyka mektebiniń úıirmelerin ashý.

Semınarǵa elimizdiń tanymal mýzyka zertteýshileri, dástúrli mýzyka ókilderi men Túrkistan oblysyna qarasty aýdan-qalalardaǵy mádenıet oshaqtarynyń mamandary qatysty.

Basqosýda QR Eńbek sińirgen qaıratkeri, Arqa ánshilik mektebiniń jalǵastyrýshysy Erlan Rysqalı men QR Eńbek sińirgen qaıratkeri, «Qurmet» ordeniniń ıegeri, Batys Qazaqstan óńiri ánshilik mektebiniń ókili Aıgúl Qosanova, sondaı-aq aqyn, sazger, termeshi, dástúrli ánshiler men jyraýlar óz oılaryn ortaǵa saldy.