Túrkistan qalalyq ortalyq aýrýhanasy kezekti patsientterine estý múmkindigin syilady. Munda IV dárejeli estý qabileti joǵalǵan 4 patsientke joǵary tehnologiialyq «Kohlearlyq implantatsiia» otasy sátti ótkizildi. Olardyń ekeýi eresek, ekeýi búldirshin, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Ankara qalasynyń Gazi ýniversiteti men aýrýhananyń birikken memorandýmy aiasynda professor Rejep Karamerttiń kómegimen statsionar otorinolaringologtarymen birge patsientterge Med EL (Avstriia) kompaniiasynyń implanttary taǵylyp, mindetti áleýmettik meditsinalyq saqtandyrý (MÁMS) sheńberinde tegin júrgizildi.
Qazirgi tańda olar ózderin jaqsy sezinip, kelesi otadan keiingi erte reabilitatsiia kezeńine daiyndalýda.
Buǵan deiin bul sanattaǵy otalar tek Astana jáne Almaty qalalarynyń ozyq klinikalarynda ǵana múmkin edi. Al byltyr alǵash ret Túrkistan oblysynda mundai múmkindikke qol jetkizgen. Túrkistan qalalyq ortalyq aýrýhanasynda 5 patsientke ota jasalǵan. Búginde estý qabileti jaqsaryp, belsendi ómir saltyn ustanýda.
Aýrýhana basshysy B.Berdenov professor Rejep Karamertti qabyldap, otorinolaringologiialyq kómekti damytýdyń eń ozyq ádistemelerin aýrýhana tájiribesine engizý jaiyn talqylady. Eki mekeme arasynda tyǵyz qarym-qatynas ornatý máselelerin pysyqtady.
Aita keteiik, biyl jyl sońyna deiin 16 ota josparlanǵan. Túrkistan oblysynyń densaýlyq saqtaý basqarmasynyń birlesken komissiia sheshimimen otaǵa jiberiletin tizimi kórsitkishterge sáikes jasaqtalǵan.
