تۇركىستان قالالىق ورتالىق اۋرۋحاناسى كەزەكتى پاسيەنتتەرىنە ەستۋ مۇمكىندىگىن سىيلادى. مۇندا IV دارەجەلى ەستۋ قابىلەتى جوعالعان 4 پاسيەنتكە جوعارى تەحنولوگيالىق «كوحلەارلىق يمپلانتاسيا» وتاسى ءساتتى وتكىزىلدى. ولاردىڭ ەكەۋى ەرەسەك، ەكەۋى ءبۇلدىرشىن، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.

انكارا قالاسىنىڭ گازي ۋنيۆەرسيتەتى مەن اۋرۋحانانىڭ بىرىككەن مەموراندۋمى اياسىندا پروفەسسور رەجەپ كارامەرتتىڭ كومەگىمەن ستاسيونار وتورينولارينگولوگتارىمەن بىرگە پاسيەنتتەرگە Med EL (اۆستريا) كومپانياسىنىڭ يمپلانتتارى تاعىلىپ، مىندەتتى الەۋمەتتىك مەديسينالىق ساقتاندىرۋ (ءمامس) شەڭبەرىندە تەگىن جۇرگىزىلدى.

قازىرگى تاڭدا ولار وزدەرىن جاقسى سەزىنىپ، كەلەسى وتادان كەيىنگى ەرتە رەابيليتاسيا كەزەڭىنە دايىندالۋدا.

بۇعان دەيىن بۇل ساناتتاعى وتالار تەك استانا جانە الماتى قالالارىنىڭ وزىق كلينيكالارىندا عانا مۇمكىن ەدى. ال بىلتىر العاش رەت تۇركىستان وبلىسىندا مۇنداي مۇمكىندىككە قول جەتكىزگەن. تۇركىستان قالالىق ورتالىق اۋرۋحاناسىندا 5 پاسيەنتكە وتا جاسالعان. بۇگىندە ەستۋ قابىلەتى جاقسارىپ، بەلسەندى ءومىر سالتىن ۇستانۋدا.

اۋرۋحانا باسشىسى ب.بەردەنوۆ پروفەسسور رەجەپ كارامەرتتى قابىلداپ، وتورينولارينگولوگيالىق كومەكتى دامىتۋدىڭ ەڭ وزىق ادىستەمەلەرىن اۋرۋحانا تاجىريبەسىنە ەنگىزۋ جايىن تالقىلادى. ەكى مەكەمە اراسىندا تىعىز قارىم-قاتىناس ورناتۋ ماسەلەلەرىن پىسىقتادى.

ايتا كەتەيىك، بيىل جىل سوڭىنا دەيىن 16 وتا جوسپارلانعان. تۇركىستان وبلىسىنىڭ دەنساۋلىق ساقتاۋ باسقارماسىنىڭ بىرلەسكەن كوميسسيا شەشىمىمەن وتاعا جىبەرىلەتىن ءتىزىمى كورسىتكىشتەرگە سايكەس جاساقتالعان.