Túrkistanda bir mezette 400 adamǵa qyzmet etetin jastar ortalyǵy ashyldy
Túrkistan qalasynda jastar jylyna orai, alǵash ret kópfýnktsionaldy zamanaýi, jańa úlgidegi «Jastar resýrstyq ortalyǵy» ǵimaraty ashyldy. Aitýly ǵimarattyń saltanatty ashylý rásimine, oblys ákimi J.Túimebaev pen QR Qoǵamdyq damý vitse-ministri J.Omarbekova, sonymen qatar «Nur Otan» partiiasy Túrkistan oblysy filialy tóraǵasynyń birinshi orynbasary N.Joldasov, oblystyq maslihat hatshysy, depýtattary men qoǵam qairatkerleri qatysty.
Barlyq aýdan qala ákimderi, basqarma basshylary, respýblikalyq qoǵamdyq uiymdardyń ókilderi men aýdan, qalalyq jastar resýrstyq ortalyqtarynyń basshylary jáne óńirdiń 200-den astam belsendi jastary keldi.
Óńir basshysy J.Túimebaev Jastar jylynyń bastalýymen jáne Túrkistan oblysy jastarynyń jańa ǵimaratynyń ashylýymen quttyqtady.
– Men búgin sizdermen ákim retinde emes, zamandastaryńyz retinde erkin pikir almasqym keledi. Óitkeni eń talantty, eń daryndy, eń otanshyl, eń eńbekqor jastar Túrkistan oblysynda turady dep esepteimin! Biyl jastarymyz úshin erekshe jyl bolǵaly tur. Elbasymyzdyń tikelei tapsyrmasymen elimizde jastardy qoldaý baǵytyndaǵy jumystar kúsheitiledi. Oblysymyzda da josparlar jasalyp, naqty jumystar bastalyp ketti. Osy kezdesýdiń aldynda men jańadan ashylǵan ǵimaratty aralap, tanysyp shyqtym. Munda jastardyń jan-jaqty damýyna, boiyndaǵy óneri men qabiletterin arttyrýyna tolyq jaǵdai jasalǵan. Mysaly, kásipkerlikpen ainalysam deýshilerge Kovorking ortalyǵy, IT-park, zańgerlik keńester qarastyrylǵan. Sonymen birge eriktiler klýby, «Jas sarbaz», elektrondy kitaphana, tilder mektebi, internet jelisi, májilis zaly, sport alańshalary jáne taǵy basqa igilikter bar. Bul – Sizder úshin jasalǵan úlken qoldaý. Endi osy jastar ortalyǵynda órenderimiz óz-ózderin damytyp, bilimderin shyńdaýlary qajet, – dedi J.Qanseiituly.
Kóp fýnktsionaldy jańa úlgidegi Jastar ortalyǵy – bir mezette 400-ge jýyq jasqa qyzmet kórsete alady. Ortalyqta «Jastarǵa qyzmet kórsetý» ortalyǵy, «Mobildi top», Turkistan HUB coworking zone, IT PARK, Robototehnika mektepteri, Kovorking alańy, elektrondy kitaphana, «Jas sarbaz», «Eriktiler mektebi», «Qurylys jasaqtary», «Tilder mektebi», túrli jastar uiymdary, media stýdiia jáne psihologiialyq terapiia syndy kóptegen jastar klýbtary, mektepter men úiirmeler jumys isteidi. Sondai-aq, ǵimarat ishinde «relax zone» demalys aimaǵy, ǵimarattyń syrtqy bóliginde fýtbol, valeibol, basketbol, tennis oinaýǵa arnalǵan sporttyq alańshalar ornalasqan.
