Uly Otan soǵysyndaǵy Jeńistiń 80 jyldyǵyn merekeleý aiasynda Túrkistan oblysynyń Qorǵanys isteri jónindegi departamenti men Bilim basqarmasynyń «Qosymsha bilim berýdi damytý óńirlik ortalyǵy» birlesip, Tólebi aýdanyndaǵy «Báisheshek» jazǵy saýyqtyrý lagerinde "Aibyn-2025" áskeri-patriottyq jiynyna arnalǵan oblystyq irikteý baiqaýyn ótkizdi,- dep habarlaidy Dalanews.kz
Saiystyń ashylýyna Túrkistan oblysynyń Qorǵanys isteri jónindegi departamentiniń basshylyǵy, sondai-aq QR Qarýly Kúshteri men lokaldi soǵystar ardagerleriniń respýblikalyq qoǵamdyq birlestiginiń ókilderi qatysty. Olar barlyq qatysýshylarǵa sáttilik tiledi.
Jalpy jarysqa Túrkistan oblysynyń aýdan-qalalarynan kelgen 17 komanda quramyndaǵy 255 jas qatysty. Jastar týrnikke tartylý, shalqasynan jatyp deneni kóterý, áskeri kross, arqan tartý, pnevmatikalyq myltyqtan atý, AK-74 avtomatyn tolyq emes bólshekteý jáne jinaqtaý, sondai-aq jalpyáskeri qorǵanys jiyntyǵyn (nakidka túrinde) kiiý sekildi jattyǵýlar boiynsha ózara baq synasty.
– Bolashaq jaýyngerlerdi jastaiynan áskeri iske baýlý, olardyń boiynda otansúigishtik jáne qaharmandyq rýh qalyptastyrý – barsha qazaqstandyqtardyń ortaq boryshy, tikelei mindeti. Bul dástúrli sharada aldyńǵy jyldarmen salystyrǵanda nátije áldeqaida jaqsy boldy. Saiys barysynda iriktelgen 10 ul men 5 qyzdyń aldaǵy respýblikalyq baiqaýda joǵary nátije kórsetetinine senemin, – dedi Respýblikalyq «Jas sarbaz» áskeri-patriottyq qozǵalysy Túrkistan oblystyq filialynyń tóraǵasy Arýjan Shekerbek.
Oblystyq áskeri-patriottyq jiynnyń qorytyndysy boiynsha I oryndy Kentaý qalasynyń komandasy, II oryndy Sairam aýdany, al III oryndy Arys qalasynyń qurama komandasy ielendi.
Jeńimpazdarǵa arnaiy marapattar, diplomdar jáne medaldar tabystaldy. Jaqyn arada jeńimpaz komanda maýsym aiynda Aqtóbe oblysynda ótetin halyqaralyq kezeńde oblys namysyn qorǵaityn bolady.
