Túrkistan oblysy ákiminiń orynbasary Beisenbai Tájibaev óńir ortalyǵynda ishimdik ishýge tyiym salý týraly bastamaǵa qatysty pikir bildirdi, dep habarlaidy Dalanews.kz.
Parlament Májilisiniń kýlýarynda sóilegen ákim orynbasary Túrkistan qalasyna iri kólemde investitsiia tartylyp jatqanyn atap ótti.
“Bul bastama jaqsy nietten týyndaǵan. Qala aqsaqaldary, intelligentsiia ókilderi men belsendi azamattar Túrkistandy “araqsyz qala” eteiik degen usynys aitqan. Alaida sońǵy jyldary oblys ortalyǵyna investitsiia kólemi aitarlyqtai artty. Týrister sany da bir millionnan asyp, onyń ishinde sheteldik týristerdiń sany 20 myńnan asyp otyr. Qalada infraqurylym qarqyndy damyp keledi: qonaqúiler, biznes ortalyqtar jáne basqa da nysandar salynýda.
Bul rette biznes qaýymdastyqtyń pikiri ekiudai. Sebebi qalaǵa kelgen týristerge tiisti deńgeide servistik qyzmet kórsetý qajet. Olar óz qajettilikteri men talaptaryna sai jaǵdaidy talap etedi. Sondyqtan ishimdikke tyiym salý týraly usynys áli de talqylanýda”, – dedi Tájibaev.
Sondai-aq ol ishimdikke tyiym salý azamattardyń quqyqtaryn shekteý retinde qarastyrylýy múmkin degen pikirge qatysty oiyn bildirdi.
“Bul máselede kásipkerler óz oilaryn aityp jatyr”, – dedi oblys ákiminiń orynbasary.
Aita keteiik, buǵan deiin májilis depýtaty Ardaq Nazarov Túrkistanda araq satpaý týraly usynys jasaǵan bolatyn.
Depýtat Túrkistan qalasy ákimdigine saýal joldady.
"Osy zań aiasynda Túrkistan - rýhani astanamyz, Túrkistan - araqsyz qala dep Túrkistanda araq ishýge, satýǵa, araq iship, láilip kóshede júrýge tyiym salsaq?! Óitkeni rýhani astana dep otyrmyz, búkil qazaq osy jerden rýh alýy kerek. Ol jerde babalarymyz, áýlie, batyr, bilerimiz jatyr. Erteń shetelden kóp qonaq keledi. Sol kezde azamattarymyz araq iship, aldynan shyǵatyn bolsa, uiat qoi. Osy zańnyń aiasynda araqsyz qala, rýhani qala dep araqqa tyiym salýǵa bola ma?" - dedi Nazarov.
Túrkistan oblysy ákiminiń orynbasary Beisenbai Tájibaev depýtattyń saýalyna jaýap berdi.
"Túrkistan oblysynda ishimdiksiz aýyl degen arnaiy joba jariialanǵan. Osy jobaǵa bizdiń oblys boiynsha otyzdan asa aýyl qosylyp otyr. Bul bastama boiynsha Túrkistan qalasynda da jergilikti ziialy qaýymmen, aqsaqaldarmen, qoǵamnyń túrli belsendi ókilderimen arnaiy talqylaýlar ótkizilgen. Túrkistan negizgi basymdyq baǵytynda rýhani-mádeni baǵytpen qatar, týristik baǵyttaǵy qala retinde de bekitilip otyr. Soǵan sáikes biznes qaýymdastyqtyń ókilderi tarapynan osy máselege túrli kózqaras týyndady. Bul másele oryndy. Aldaǵy ýaqytta zań normalary aiasynda qarastyrý qajet dep sanaimyz", - dedi ol.
Eske salaiyq, kelesi jyly Túrkistan qalasyna erekshe mártebe beriledi. Búgin Májilis depýtattary Túrkistan qalasyna erekshe mártebe berý týraly zań jobasyn aiaqtap, birinshi oqylymǵa usynýǵa daiyn.
Bul qujat Túrkistandy Qazaqstannyń rýhani-mádeni, tarihi jáne týristik ortalyǵy retinde damytýǵa baǵyttalǵan.
