Túrkistanda 8 naýryz – Halyqaralyq áielder kúnine arnalǵan «Álemniń jaryǵy – ana» merekelik is-sharasy ótti. Saltanatty jiynda óz salalary boiynsha Túrkistan óńiriniń damýyna úles qosyp júrgen ardaqty ájeler men hanymdar, kópbalaly analar, isker arýlarǵa qurmet kórsetildi, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Túrkistan oblysy ákimi Darhan Satybaldy ardaqty analar men qyz-kelinshekterdi merekelerimen quttyqtady.
– Sizderdi kóktemniń eń aiaýly ári shýaqty merekesi – 8 Naýryz – Halyqaralyq áielder kúnimen shyn júrekten quttyqtaimyn. Kóktem, sulýlyq jáne Ana – qanattas uǵymdar. Ana – shýaq, ana – meiirim, ana – izgilik. Adamzat balasynyń analarǵa degen mahabbaty men qurmeti eshqashan seiilmeidi.
Barlyq adam anaǵa qaryzdar. Kóshbasshy da, qairatker de, batyr da, aqyn da anadan týady. Qazaq halqy qyz balasyn asa qadirlep, ardaqty analardy qurmettegen. Qaryndasty qorǵap, arýlardy aialaǵan.
Sizder Túrkistan óńirin órkendetý jolynda da jemisti eńbek etip kelesizder. Túrkistan – kópbalaly analar sany jaǵynan el boiynsha aldyńǵy orynda. 2023 jyly óńirde 54 myńnan astam sábi dúnie esigin ashty. Oblysymyzda 179 myńnan asa kópbalaly ana bar. 2500 «Batyr ana», 17 myńǵa jýyq ana «Altyn alqa», 4 myń «Ana dańqy» ordenderiniń iegeri sanaly urpaq ósirýde. Ardaqty analarymyz tek otbasynyń uiytqysy ǵana bolyp qoimai, qoǵamnyń barlyq salasynda jemisti eńbek etip keledi.
Sizder meiirim men danalyqtyń qainar bulaǵysyzdar. Gúl kóktem men sulýlyqtyń syńarysyzdar! Sizderdi Halyqaralyq hanymdar merekesimen quttyqtai otyryp, uzaq ómir, zor densaýlyq, móldir mahabbat tileimin! – degen Darhan Satybaldy qoǵamǵa óz eńbegin sińirip júrgen hanymdar men isker arýlarǵa marapattaryn tabystady.
Túrkistan mýzykalyq drama teatrynda ótken merekelik is-shara maǵynaly ári mazmundy, shabyt pen sezimge toly kontsertpen órnekteldi. «Kongress holl» kópsalaly kesheniniń «Jana lep» ujymy «Kóktem áni» mýzykalyq - poetikalyq qoiylymyn usyndy.
Bul qoiylymda qazaq poeziiasynyń klassikteri men qazirgi jas aqyndardyń óleńderi alma-kezek oqyldy. Sonymen qatar qazaq ániniń «altyn ǵasyryn» jasaǵan kompozitorlar men búgingi jas kompozitorlardyń ánderi shyrqalyp, kompozitsiialyq qoiylym rejisserlik jáne horeografiialyq sheshimder arqyly órnektele tústi. Ónerpazdar kórermendi anany qurmetteý, mahabatty aialai bilýge shaqyrdy. Túrkistan ónerpazdary kóktemdi, anany, arýlardy án men jyrǵa qosty.
Búginde Túrkistan óńirinde kásipkerlik, biznes salasyndaǵy hanymdardyń úlesi jyl sanap artýda. Oblys kóleminde shamamen 213 myńnan astam kásipker bar. Onyń 68 000 myńy – qyz-kelinshekter. Iaǵni, shaǵyn jáne orta kásipkerliktiń 31 %-ynda isker hanymdar basshylyq jasap jatyr. Qazirgi jaǵdai boiynsha Túrkistan oblysyndaǵy is basyndaǵy 5 myńnan asa memlekettik qyzmetshiniń 27%-yn názikjandylar quraidy.
Osylaisha, belsendi ári isker hanymdarymyz el ekonomikasynyń damýyna da aitarlyqtai úles qosýda. Sonymen birge qazaqtyń qaisar qyzdary men ardaqty analary bilim berý, meditsina jáne ózge de salalarda abyroily eńbek etip júr.
