Túrkistan oblysynda 6-synyp oqýshysy sabaq ýaqytynda qaitys bolǵan. Dalanews.kz osy oqiǵaǵa bailanysty óńirdiń Politsiia departamentine saýal joldady.
BAQ-ta qandai aqparat tarady?
"Kýrsiv" basylymy málimetinshe, Túrkistan oblysy Qazyǵurt aýdany Jumysshy aýylynda 6-synyp oqýshysy Ulaǵat Seidýlla sabaq ýaqytynda qaitys bolǵan.
Anasy Gúlmira Kósheevnyń sózinshe, oiyn balasy synyptasynyń telefonyn tartyp alyp qashqanda, synyptasy artynan kelip býyndyrǵan. Aýa jetpei tunshyqqan Ulaǵat oqiǵa ornynda til tartpai qaitys bolǵan.
Oqiǵa 7 aqpanda Qazyǵurt aýdany Jumysshy aýylyndaǵy A.Orazbaeva atyndaǵy jalpy orta mekteptiń tarih páni kabinetinde bolǵan. 12 jastaǵy Ulaǵat Seidolla ádettegidei anasymen qoshtasyp, sabaǵyna ketip, úiine tabytpen oralǵan.
Gúlmira Kósheeva "balamnyń ólimine sebepshi bolǵandar jazasyz qalmasa" deidi.
Kúdikti oqýshy 12 jasqa tolmaýyna bailanysty qylmystyq jaýaptan bosatylyp, qylmystyq is qysqarǵan. Onyń ata-anasyna aiyppul salynǵan.
Politsiia ne deidi?
Túrkistan oblysy Politsiia departamenti Dalanews.kz-ke bergen jaýabynda mán-jaidy túsindirdi.
"7 aqpanda Túrkistan oblysynyń Qazyǵurt aýdanynda kámeletke tolmaǵan balanyń qaitys bolý deregi boiynsha QR QK-niń 141-baby 2-bóligimen (Balalardyń ómiri men densaýlyǵynyń qaýipsizdigin qamtamasyz etý jónindegi mindetterdi tiisinshe oryndamaý) qylmystyq is qozǵaldy. Tergeý barysynda oqýshynyń qaitys bolýy densaýlyq jaǵdaiynyń kúrt nasharlaýyna bailanysty bolǵany anyqtaldy. Ol meditsinalyq mekemege barar jolda qaitys boldy", - dedi politsiia.
Tergeý aiasynda kýálardan, oqytýshylardan jaýaptar alynǵan.
"Jábirlenýshilerdiń dálelderi men alynǵan beinejazbalar zertteldi, birqatar qajet saraptama taǵaiyndaldy. Sot-meditsinalyq saraptamanyń qorytyndysyna sáikes jábirlenýshiniń ólimi tynys alý joldary jabylyp, tildiń kómeige túsýinen týyndaǵan asfiksiia saldarynan bolǵan", - dedi PD ókili.
Túrkistan oblysy PD baspasóz qyzmeti ókili "máiitten zorlyq-zombylyq, uryp-soǵý, tunshyǵý belgileri tabylmady" dep otyr.
"Tergeý nátijesi boiynsha ólimniń qylmystyq sipaty anyqtalmady jáne qylmystyq quqyqbuzýshylyq quramy bolmaýyna bailanysty qylmystyq is toqtatyldy. Toqtatý týraly bekitilgen qaýlyny prokýror tekserip, qabyldanǵan sheshimniń zańdylyǵyn qarap shyqty. Sonymen qatar, ákimdikke oqiǵalar men quqyqbuzýshylyqtarǵa yqpal etken mán-jailardy joiý jóninde usynys engizildi", - dedi politsiia.
Bul jaǵdaidan keiin politsiia mektep direktory men bes pedagog jumystan shyǵarylǵanyn málimdedi.
