تۇركىستان وبلىسىندا 6-سىنىپ وقۋشىسى ساباق ۋاقىتىندا قايتىس بولعان. Dalanews.kz وسى وقيعاعا بايلانىستى ءوڭىردىڭ پوليسيا دەپارتامەنتىنە ساۋال جولدادى.
باق-تا قانداي اقپارات تارادى؟
"كۋرسيۆ" باسىلىمى مالىمەتىنشە، تۇركىستان وبلىسى قازىعۇرت اۋدانى جۇمىسشى اۋىلىندا 6-سىنىپ وقۋشىسى ۇلاعات سەيدۋللا ساباق ۋاقىتىندا قايتىس بولعان.
اناسى گۇلميرا كوشەيەۆنىڭ سوزىنشە، ويىن بالاسى سىنىپتاسىنىڭ تەلەفونىن تارتىپ الىپ قاشقاندا، سىنىپتاسى ارتىنان كەلىپ بۋىندىرعان. اۋا جەتپەي تۇنشىققان ۇلاعات وقيعا ورنىندا ءتىل تارتپاي قايتىس بولعان.
وقيعا 7 اقپاندا قازىعۇرت اۋدانى جۇمىسشى اۋىلىنداعى ا.ورازبايەۆا اتىنداعى جالپى ورتا مەكتەپتىڭ تاريح ءپانى كابينەتىندە بولعان. 12 جاستاعى ۇلاعات سەيدوللا ادەتتەگىدەي اناسىمەن قوشتاسىپ، ساباعىنا كەتىپ، ۇيىنە تابىتپەن ورالعان.
گۇلميرا كوشەيەۆا "بالامنىڭ ولىمىنە سەبەپشى بولعاندار جازاسىز قالماسا" دەيدى.
كۇدىكتى وقۋشى 12 جاسقا تولماۋىنا بايلانىستى قىلمىستىق جاۋاپتان بوساتىلىپ، قىلمىستىق ءىس قىسقارعان. ونىڭ اتا-اناسىنا ايىپپۇل سالىنعان.
پوليسيا نە دەيدى؟
تۇركىستان وبلىسى پوليسيا دەپارتامەنتى Dalanews.kz-كە بەرگەن جاۋابىندا ءمان-جايدى ءتۇسىندىردى.
"7 اقپاندا تۇركىستان وبلىسىنىڭ قازىعۇرت اۋدانىندا كامەلەتكە تولماعان بالانىڭ قايتىس بولۋ دەرەگى بويىنشا ق ر قك-نىڭ 141-بابى 2-بولىگىمەن (بالالاردىڭ ءومىرى مەن دەنساۋلىعىنىڭ قاۋىپسىزدىگىن قامتاماسىز ەتۋ جونىندەگى مىندەتتەردى تيىسىنشە ورىنداماۋ) قىلمىستىق ءىس قوزعالدى. تەرگەۋ بارىسىندا وقۋشىنىڭ قايتىس بولۋى دەنساۋلىق جاعدايىنىڭ كۇرت ناشارلاۋىنا بايلانىستى بولعانى انىقتالدى. ول مەديسينالىق مەكەمەگە بارار جولدا قايتىس بولدى"، - دەدى پوليسيا.
تەرگەۋ اياسىندا كۋالاردان، وقىتۋشىلاردان جاۋاپتار الىنعان.
"جابىرلەنۋشىلەردىڭ دالەلدەرى مەن الىنعان بەينەجازبالار زەرتتەلدى، ءبىرقاتار قاجەت ساراپتاما تاعايىندالدى. سوت-مەديسينالىق ساراپتامانىڭ قورىتىندىسىنا سايكەس جابىرلەنۋشىنىڭ ءولىمى تىنىس الۋ جولدارى جابىلىپ، ءتىلدىڭ كومەيگە تۇسۋىنەن تۋىنداعان اسفيكسيا سالدارىنان بولعان"، - دەدى پد وكىلى.
تۇركىستان وبلىسى پد باسپا ءسوز قىزمەتى وكىلى "مايىتتەن زورلىق-زومبىلىق، ۇرىپ-سوعۋ، تۇنشىعۋ بەلگىلەرى تابىلمادى" دەپ وتىر.
"تەرگەۋ ناتيجەسى بويىنشا ءولىمنىڭ قىلمىستىق سيپاتى انىقتالمادى جانە قىلمىستىق قۇقىقبۇزۋشىلىق قۇرامى بولماۋىنا بايلانىستى قىلمىستىق ءىس توقتاتىلدى. توقتاتۋ تۋرالى بەكىتىلگەن قاۋلىنى پروكۋرور تەكسەرىپ، قابىلدانعان شەشىمنىڭ زاڭدىلىعىن قاراپ شىقتى. سونىمەن قاتار، اكىمدىككە وقيعالار مەن قۇقىقبۇزۋشىلىقتارعا ىقپال ەتكەن ءمان-جايلاردى جويۋ جونىندە ۇسىنىس ەنگىزىلدى"، - دەدى پوليسيا.
بۇل جاعدايدان كەيىن پوليسيا مەكتەپ ديرەكتورى مەن بەس پەداگوگ جۇمىستان شىعارىلعانىن مالىمدەدى.
