Biyl Túrkistan oblysy boiynsha 1,060 myń sharshy metr turǵyn úi alańyn paidalanýǵa tapsyrý josparlanǵan. Osy jyldyń 7 aiynyń qorytyndysymen 528,3 myń sharshy metr turǵyn úi alańy paidalanýǵa tapsyryldy. Ótken jyldyń tiisti kezeńimen salystyrǵanda ósim 115%-dy qurady. Bul týraly oblys basshysy Nuralhan Kósherovtiń tóraǵalyǵymen ótken jiynda aityldy,- dep habarlaidy Dalanews.kz
Oblys ákimi biýdjet qarajatyna satyp alý josparlanǵan turǵyn úilerdiń qurylys sapasyna aýdan-qala ákimdikteri tarapynan baqylaýdy kúsheitý qajet ekenin aityp, jaýapty basshylarǵa birqatar mindet júktedi.
Jiynda Túrkistan oblysy qurylys basqarmasynyń basshysy Abai Turhanov oblystaǵy arendalyq jáne kredittik turǵyn úilerdiń qurylysy týraly baiandady. Onyń málimdeýinshe, búgingi tańda óńirde kredittik 2138 páterli 30 turǵyn úidiń qurylysy júrgizilýde. Sonyń ishinde, Túrkistan qalasynda 1182 páterli 17 turǵyn úi jáne Kentaý qalasynda 60 páterli 1 turǵyn úi paidalanýǵa tapsyryldy. Qalǵan 12 turǵyn úidi qyrkúiek aiynda paidalanýǵa berý josparlanýda. Bul páterlerdi «Otbasy bank» arqyly kezektegi azamattarǵa satý kózdelgen. Sonymen qatar 296 páterli 6 arendalyq turǵyn úi salynýda.
Odan bólek, 578 arendalyq jáne 2015 kredittik páterler satyp alý kózdelgen. Búginde Túrkistan qalasynan 84 páter satyp alyndy. Qalǵan 494 páter josparǵa sáikes qarasha aiyna deiin satyp alynýy tiis. Al, kredittik páterlerdi satyp alý boiynsha jumystar júrgizilýde.
Sondai-aq, óńirde jospardan tys 2 322 páterdiń qurylysy júrgizilip jatyr. Bul páterlerdiń qurylysy 2026 jyly aiaqtalady.
