بيىل تۇركىستان وبلىسى بويىنشا 1،060 مىڭ شارشى مەتر تۇرعىن ءۇي الاڭىن پايدالانۋعا تاپسىرۋ جوسپارلانعان. وسى جىلدىڭ 7 ايىنىڭ قورىتىندىسىمەن 528،3 مىڭ شارشى مەتر تۇرعىن ءۇي الاڭى پايدالانۋعا تاپسىرىلدى. وتكەن جىلدىڭ ءتيىستى كەزەڭىمەن سالىستىرعاندا ءوسىم 115%-دى قۇرادى. بۇل تۋرالى وبلىس باسشىسى نۇرالحان كوشەروۆتىڭ توراعالىعىمەن وتكەن جيىندا ايتىلدى،- دەپ حابارلايدى Dalanews.kz
وبلىس اكىمى بيۋدجەت قاراجاتىنا ساتىپ الۋ جوسپارلانعان تۇرعىن ۇيلەردىڭ قۇرىلىس ساپاسىنا اۋدان-قالا اكىمدىكتەرى تاراپىنان باقىلاۋدى كۇشەيتۋ قاجەت ەكەنىن ايتىپ، جاۋاپتى باسشىلارعا ءبىرقاتار مىندەت جۇكتەدى.
جيىندا تۇركىستان وبلىسى قۇرىلىس باسقارماسىنىڭ باسشىسى اباي تۇرحانوۆ وبلىستاعى ارەندالىق جانە كرەديتتىك تۇرعىن ۇيلەردىڭ قۇرىلىسى تۋرالى باياندادى. ونىڭ مالىمدەۋىنشە، بۇگىنگى تاڭدا وڭىردە كرەديتتىك 2138 پاتەرلى 30 تۇرعىن ءۇيدىڭ قۇرىلىسى جۇرگىزىلۋدە. سونىڭ ىشىندە، تۇركىستان قالاسىندا 1182 پاتەرلى 17 تۇرعىن ءۇي جانە كەنتاۋ قالاسىندا 60 پاتەرلى 1 تۇرعىن ءۇي پايدالانۋعا تاپسىرىلدى. قالعان 12 تۇرعىن ءۇيدى قىركۇيەك ايىندا پايدالانۋعا بەرۋ جوسپارلانۋدا. بۇل پاتەرلەردى «وتباسى بانك» ارقىلى كەزەكتەگى ازاماتتارعا ساتۋ كوزدەلگەن. سونىمەن قاتار 296 پاتەرلى 6 ارەندالىق تۇرعىن ءۇي سالىنۋدا.
ودان بولەك، 578 ارەندالىق جانە 2015 كرەديتتىك پاتەرلەر ساتىپ الۋ كوزدەلگەن. بۇگىندە تۇركىستان قالاسىنان 84 پاتەر ساتىپ الىندى. قالعان 494 پاتەر جوسپارعا سايكەس قاراشا ايىنا دەيىن ساتىپ الىنۋى ءتيىس. ال، كرەديتتىك پاتەرلەردى ساتىپ الۋ بويىنشا جۇمىستار جۇرگىزىلۋدە.
سونداي-اق، وڭىردە جوسپاردان تىس 2 322 پاتەردىڭ قۇرىلىسى جۇرگىزىلىپ جاتىر. بۇل پاتەرلەردىڭ قۇرىلىسى 2026 جىلى اياقتالادى.
