Búgin Túrkistanda Kitaphanashylar kúnine orai «Mahabbatym – kitap, mamandyǵym – kitaphanashy» taqyrybynda merekelik jiyndy ótti. Is-sharany Oblystyq mádeniet basqarmasy basshysynyń orynbasary Erjan Isataev ashyp berip, barsha jinalǵan kitaphanashylardy kásibi merekemen quttyqtady, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
– Búginde oblystyń kitaphana salasy qarqyndy damyp keledi. Óńirdegi 399 kitaphananyń qazany kúnde qainap jatady. «Farab» ámbebap ǵylymi kitaphanasy ekinshi jyl qatarynan elimiz boiynsha úzdik atanyp otyr.
Jalpy kitaphanashylar eńbegi elenip, oblystyq, respýblikalyq saiystarda top jarýda. Bul biz úshin úlken jetistik. Kitaphananyń árbir qyzmetkeri óz isin súietin, kitapqumar jandar. Oqyrmannyń árbir suranysyna jaýap berip, kóńilinen shyǵyp otyrý da úlken jaýapkershilikti talap etedi. Eńbekterińizdi joǵary baǵalaimyz. Sizderge kásibi damý, shyǵarmashylyq tabys tileimin – dedi basqarma basshysynyń orynbasary.
Shara barysynda eńbegi elengen bir top sala mamandary marapattaldy. Óńir kitaphanashylary oblys ákiminiń, oblys ákiminiń orynbasarynyń, oblystyq mádeniet basqarmasy basshysynyń, QR Ulttyq kitaphanasy men QR Ulttyq akademiialyq kitaphanasynyń direktorlarynyń, «Bitimger» mediatorlardyń qoǵamdyq birlestiginiń jáne «Qoǵamdyq kelisim» mekemesiniń alǵys hatymen marapattaldy. Sonymen qatar keshti túiindegen «Farab» kitaphanasynyń direktory Janat Shardarbekova kópshilikke alǵys bildirip, aýdan, qalalardaǵy áriptesterine marapattaryn tabystady. Sonymen qatar «Qazaqstannyń Qurmetti kitaphanashysy» tósbelgisimen kitaphana salasynyń ardagerin marapattady. Merekelik kesh ári qarai Túrkistan qalalyq mádeniet úiiniń ónerpazdarynyń kontserttik baǵdarlamasyna ulasty.
Aita keteiik, QR Úkimetiniń 2022 jyldyń 18 qazandaǵy № 833 qaýlysymen «24 qazan – Kitaphanyshlar kúni» bolyp bekitilgen bolatyn.
