Túrkistan oblysyndaǵy Tólebi aýdanynda balalardy jazǵy saýyqtyrýǵa arnalǵan modýldi lager ashyldy. Jańadan salynyp, paidalanýǵa berilgen qosymsha 14 nysanda 7 aýysym boiynsha 2 myńnan astam bala jaz boiy demalmaq,- dep habarlaidy Dalanews.kz
«Tólebi nury» otbasy úlgisindegi balalar úiiniń lageri alǵashqy aýysymda Qazyǵurt aýdanynyń 300-den astam oqýshysyn qabyldap úlgerdi. Barlyǵy kópbalaly jáne az qamtylǵan otbasynda tárbielenip jatqan balalar.
Búgin saltanatty lenta qiiý rásimine Túrkistan oblysy ákiminiń orynbasary Beisenbai Tájibaev arnaiy kelip qatysyp, quttyqtaýyn arnady.
— Jazǵy demalys – balalar úshin qýanysh pen shabytqa toly erekshe kezeń. Lager ashý – bolashaqqa salynǵan investitsiia. Jas býynnyń jan-jaqty damýyna, bos ýaqytyn tiimdi ári mazmundy ótkizýine baǵyttalǵan modýldi jazǵy lager óz jumysyn bastady. Bul joba — memlekettiń qarajatyn tiimdi paidalana otyra, qajettilikterdi qamtamasyz etedi. 5 memlekettik lagerde 52 modýldi lager salynyp jatyr. Joba negizinde 7500-den astam qosymsha oryn ashýǵa múmkindik týdy. Oblys ákimi Nuralhan Oralbaiuly qoldaý kórsetti. Osy apta Saryaǵash aýdanyndaǵy «Baldáýren» lageri 487 balany qabyldady. Maýsymdyq nysandardyń qurylysy qolǵa alynǵan sátten basy-qasynda júrip, sapaly iske asyrylýyn baqyladyq. Búgin jasóspirimderdiń baqytty júzderine taǵy kýá bolyp turmyz. Endigi maqsat — balalarǵa shynaiy shattyq pen qaýipsiz orta syilaý. Osy ortaq mindetti abyroimen atqarýǵa shaqyramyn. Uiymdastyrýǵa atsalysqan barsha áriptesterge, ata-analarǵa jáne tárbieshilerge alǵys bildiremiz! Oqýshylarǵa kóterińki kóńil-kúi men umytylmas sátter tileimiz!, — dedi Beisenbai Dáýletuly.
Is-sharada oblystyq bilim basqarmasy basshysynyń orynbasary J.Nurpeiisov, Qazyǵurt aýdany ákiminiń orynbasary M.Áshirbaev, Tólebi aýdany ákimi apparatynyń basshysy A.Ómirtai, aýdandyq bilim bóliminiń basshysynyń m.a G.Abilhasova boi kórsetti. Qos aýdannyń ardagerleri igilikti bastamany júzege asyrǵan azamattarǵa alǵys bildirip, batalaryn berdi.
«Tólebi nury» lagerinde 14 modýldi nysannan bólek, ashana, bassein, qyzdar men er balalarǵa jeke ájethana men jýynatyn oryndar, shatyrlar bar. Ár modýldi ǵimaratta 20 oqýshyǵa arnalǵan jatyn oryndary qarastyrylǵan. Bári jańa jihazdarmen qamtylǵan. Balalardyń bes mezgil tamaqtanýy, qaýipsizdigi, kúndelikti baǵdarlamasy, oiyndary men saiystary, intellektýaldyq jáne mádeni sharalary baqylaýda.
Jazǵy lager — tek demalys orny ǵana emes, shyǵarmashylyqty ushtaityn, dostyqty nyǵaitatyn, jańa qabiletter men qyzyǵýshylyqtardy damytatyn orta. Áleýmettik teńdikti, patriottyq tárbieni nasihattaidy. Munda ár bala ózin erkin sezinip, óneri men sporttyq qabiletin shyńdaidy. Kóshbasshylyq qasietterin jetildiredi. Salaýatty ómir saltyn ustanýǵa beiimdeidi. Ulttyq qundylyqtardy boiyna sińiredi. Balalardy qylmystan, kóshedegi qaýip-qaterden qorǵaidy.
Aita keteiik, Túrkistan óńirinde jalpy 43 myńnan astam bala jazǵy saýyqtyrý aimaqtarynda tynyǵady. 10 memlekettik jáne 24 jekemenshik lager qyzmet kórsetedi. Budan bólek, 300 myńnan astam oqýshy mektep janyndaǵy lagerler men arnaiy ekskýrsiialar, tanymdyq sharalarǵa qatysady. Jaýapty basqarmalarmen birlesip uiymdastyrý jalǵasady.
