تۇركىستان وبلىسىنداعى تولەبي اۋدانىندا بالالاردى جازعى ساۋىقتىرۋعا ارنالعان ءمودۋلدى لاگەر اشىلدى. جاڭادان سالىنىپ، پايدالانۋعا بەرىلگەن قوسىمشا 14 نىساندا 7 اۋىسىم بويىنشا 2 مىڭنان استام بالا جاز بويى دەمالماق،- دەپ حابارلايدى Dalanews.kz
«تولەبي نۇرى» وتباسى ۇلگىسىندەگى بالالار ءۇيىنىڭ لاگەرى العاشقى اۋىسىمدا قازىعۇرت اۋدانىنىڭ 300-دەن استام وقۋشىسىن قابىلداپ ۇلگەردى. بارلىعى كوپبالالى جانە از قامتىلعان وتباسىندا تاربيەلەنىپ جاتقان بالالار.
بۇگىن سالتاناتتى لەنتا قيۋ راسىمىنە تۇركىستان وبلىسى اكىمىنىڭ ورىنباسارى بەيسەنباي تاجىبايەۆ ارنايى كەلىپ قاتىسىپ، قۇتتىقتاۋىن ارنادى.
— جازعى دەمالىس – بالالار ءۇشىن قۋانىش پەن شابىتقا تولى ەرەكشە كەزەڭ. لاگەر اشۋ – بولاشاققا سالىنعان ينۆەستيسيا. جاس بۋىننىڭ جان-جاقتى دامۋىنا، بوس ۋاقىتىن ءتيىمدى ءارى مازمۇندى وتكىزۋىنە باعىتتالعان ءمودۋلدى جازعى لاگەر ءوز جۇمىسىن باستادى. بۇل جوبا — مەملەكەتتىڭ قاراجاتىن ءتيىمدى پايدالانا وتىرا، قاجەتتىلىكتەردى قامتاماسىز ەتەدى. 5 مەملەكەتتىك لاگەردە 52 ءمودۋلدى لاگەر سالىنىپ جاتىر. جوبا نەگىزىندە 7500-دەن استام قوسىمشا ورىن اشۋعا مۇمكىندىك تۋدى. وبلىس اكىمى نۇرالحان ورالباي ۇلى قولداۋ كورسەتتى. وسى اپتا سارىاعاش اۋدانىنداعى «بالداۋرەن» لاگەرى 487 بالانى قابىلدادى. ماۋسىمدىق نىسانداردىڭ قۇرىلىسى قولعا الىنعان ساتتەن باسى-قاسىندا ءجۇرىپ، ساپالى ىسكە اسىرىلۋىن باقىلادىق. بۇگىن جاسوسپىرىمدەردىڭ باقىتتى جۇزدەرىنە تاعى كۋا بولىپ تۇرمىز. ەندىگى ماقسات — بالالارعا شىنايى شاتتىق پەن ءقاۋىپسىز ورتا سىيلاۋ. وسى ورتاق مىندەتتى ابىرويمەن اتقارۋعا شاقىرامىن. ۇيىمداستىرۋعا اتسالىسقان بارشا ارىپتەستەرگە، اتا-انالارعا جانە تاربيەشىلەرگە العىس بىلدىرەمىز! وقۋشىلارعا كوتەرىڭكى كوڭىل-كۇي مەن ۇمىتىلماس ساتتەر تىلەيمىز!، — دەدى بەيسەنباي داۋلەت ۇلى.
ءىس-شارادا وبلىستىق ءبىلىم باسقارماسى باسشىسىنىڭ ورىنباسارى ج.نۇرپەيىسوۆ، قازىعۇرت اۋدانى اكىمىنىڭ ورىنباسارى م.اشىربايەۆ، تولەبي اۋدانى اكىمى اپپاراتىنىڭ باسشىسى ا.ءومىرتاي، اۋداندىق ءبىلىم ءبولىمىنىڭ باسشىسىنىڭ م.ا گ.ابيلحاسوۆا بوي كورسەتتى. قوس اۋداننىڭ ارداگەرلەرى يگىلىكتى باستامانى جۇزەگە اسىرعان ازاماتتارعا العىس ءبىلدىرىپ، باتالارىن بەردى.
«تولەبي نۇرى» لاگەرىندە 14 ءمودۋلدى نىساننان بولەك، اسحانا، باسسەين، قىزدار مەن ەر بالالارعا جەكە اجەتحانا مەن جۋىناتىن ورىندار، شاتىرلار بار. ءار ءمودۋلدى عيماراتتا 20 وقۋشىعا ارنالعان جاتىن ورىندارى قاراستىرىلعان. ءبارى جاڭا جيھازدارمەن قامتىلعان. بالالاردىڭ بەس مەزگىل تاماقتانۋى، قاۋىپسىزدىگى، كۇندەلىكتى باعدارلاماسى، ويىندارى مەن سايىستارى، ينتەللەكتۋالدىق جانە مادەني شارالارى باقىلاۋدا.
جازعى لاگەر — تەك دەمالىس ورنى عانا ەمەس، شىعارماشىلىقتى ۇشتايتىن، دوستىقتى نىعايتاتىن، جاڭا قابىلەتتەر مەن قىزىعۋشىلىقتاردى دامىتاتىن ورتا. الەۋمەتتىك تەڭدىكتى، پاتريوتتىق تاربيەنى ناسيحاتتايدى. مۇندا ءار بالا ءوزىن ەركىن سەزىنىپ، ونەرى مەن سپورتتىق قابىلەتىن شىڭدايدى. كوشباسشىلىق قاسيەتتەرىن جەتىلدىرەدى. سالاۋاتتى ءومىر سالتىن ۇستانۋعا بەيىمدەيدى. ۇلتتىق قۇندىلىقتاردى بويىنا سىڭىرەدى. بالالاردى قىلمىستان، كوشەدەگى قاۋىپ-قاتەردەن قورعايدى.
ايتا كەتەيىك، تۇركىستان وڭىرىندە جالپى 43 مىڭنان استام بالا جازعى ساۋىقتىرۋ ايماقتارىندا تىنىعادى. 10 مەملەكەتتىك جانە 24 جەكەمەنشىك لاگەر قىزمەت كورسەتەدى. بۇدان بولەك، 300 مىڭنان استام وقۋشى مەكتەپ جانىنداعى لاگەرلەر مەن ارنايى ەكسكۋرسيالار، تانىمدىق شارالارعا قاتىسادى. جاۋاپتى باسقارمالارمەن بىرلەسىپ ۇيىمداستىرۋ جالعاسادى.
