Túrkistan oblysy aýmaǵynda «Taza Qazaqstan» baǵdarlamasy aiasynda tazalyq jumystary kúndelikti ótkizilip keledi. Naqtyraq aitsaq, qazirgi tańda aýdan, qalalarda jalpy 500-ge jýyq aýqymdy tazalyq is-sharasy ótkizildi. Búgin Shardara aýdanynda, «Uzyn Ata» kesenesi mańyn tazalaý jumystary júrgizilýde. Eko-aktsiiaǵa 10 aýyldyq okrýgten 150 adam qatysty.
Sharaǵa aýdannyń aqsaqaldar alqasy, belsendi jastar, úkimettik emes uiym ókilderi, turǵyndar qatysty.
«Taza Qazaqstan» - elimizdegi eń aýqymdy shara. Bul baǵdarlama árbir turǵynnyń ekologiialyq mádenietin qalyptastyrýǵa, týǵan jerdi taza ustaýǵa baǵyttalǵan. Biz óz ólkemizdi keler urpaqqa taza, ekologiiasy qalyptasqan, qoqyssyz, jasyl jelekti jer retinde qaldyrýymyz kerek», dedi ardagerler keńesiniń tóraǵasy Berdibekov Toqsanbai aqsaqal.
Ótken aptanyń ishinde 11 aýdannyń 25 eldi mekeninde aýqymdy senbilikter ótkizilip, nátijesinde 28,2 tonna qoqys shyǵaryldy. Tazalyq jumystaryna 2 myńnan astam turǵyn qatysyp, 27 tehnika jumyldyryldy.
Búgingi tańda «Taza Qazaqstan» telegram bot platformasyna 490 ótinim túsken. Onyń ishinde, 472 ótinim oryndalǵan, 2 ótinim oryndalý barysynda, 16 ótinim maǵynasyz bolǵandyqtan, keri qaitarylǵan. Sonymen qatar biyl qoǵamdyq oryndarda zań talaptaryn buzǵan 25 300-ge jýyq azamatqa hattama toltyrylyp, 288,5 mln teńgege aiyppul salyndy. Budan bólek, abattandyrý qaǵidasyna sáikes irgeles jatqan aýmaqtyń tazalyǵy boiynsha jeke turǵyn úiler men kásipkerlik nysandaryna monitoring júrgizildi. Nátijesinde, 1217 eskertý jáne 625 aiyppul salyndy. Qaǵidanyń sapaly oryndaý baǵytyndaǵy jumystar kúndelikti júrgiziledi.
«Taza Qazaqstan» baǵdarlamasy aiasynda aýdan, qala ákimdikteri men oblystyq tabiǵi resýrstar jáne tabiǵatty paidalanýdy retteý basqarmasymen birlesip kúzde aǵash otyrǵyzý boiynsha aýqymdy aktsiia ótkizý josparlanýda. Atap aitqanda, oblys aýmaǵynda jalpy 500 myńnan astam aǵash otyrǵyzylmaq. Bul aktsiia óńirlerdi kógaldandyrýǵa, ekologiialyq jaǵdaidy jaqsartýǵa jáne halyqtyń ómir súrýine qolaily jaǵdai jasaýǵa baǵyttalǵan. Búginde aǵashtardy otyrǵyzýǵa daiyndyq jumystary júrgizilýde.
Atap óteiik, «Taza Qazaqstan» baǵdarlamasy aiasynda oblysta «Úlgili aýyl» baiqaýy ótýde. Oǵan qazirgi tańda oblystyq deńgeige 75 aýyl qatysyp jatyr. Al Arys qalasynda atalǵan baiqaý «Úlgili úi», «Úlgili aýla», «Úlgili kóshe», «Úlgili aýyl» jáne «Úlgili kireberis» nominatsiialaryn da júzege asyrýda. Bul baiqaý qalanyń kórkin arttyryp, turǵyndar arasynda kóriktendirý jáne tazalyqqa degen jaýapkershilikti arttyrý maqsatynda uiymdastyrylǵan bolatyn.
