Shomylý maýsymy bastalǵaly Túrkistan oblysyna qarasty jaǵajai aýmaqtarynda qaýipsizdik jáne tazalyq sharalary kúshe tústi. Shardaradaǵy jaǵajaida osyǵan deiin anyqtalǵan kemshilikter boiynsha naqty jumystar júrgizilip, demalýshylarǵa qolaily jaǵdai jasaldy, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Búgin Túrkistan oblysy ákimi Nuralhan Kósherov «Shardara» sý qoimasynyń jaǵalaýynda ornalasqan birqatar demalys oryndaryn kezekti ret aralap, tazalyǵy pen qaýipsizdigin, ótken saparda berilgen tapsyrmalarynyń oryndalý barysyn baqylady. Oblys basshysy jaǵajailarǵa jaýapty tulǵalarmen, kásipkerlermen júzdesip, munda sanitarlyq tazalyq sharalaryn kúndelikti uqypty oryndaýdy tapsyrdy.
– Tazalyq pen qaýipsizdik – týrizmdi damytýdyń bir tetigi. Demalýshylarǵa, saiahatshylarǵa qolaily jaǵdai jasalýy kerek. Bul baǵyttaǵy jumystar jalǵasady, – dedi Nuralhan Kósherov.
Shardaradaǵy jaǵajailar retke keltirilgen. Monitoring jumystary turaqty júrgizilip, politsiia qyzmetkerleri tarapynan qaýipsizdik talaptary qatań qadaǵalanýda. Tekserý barysynda 409 sákiniń 171-i talapqa sai bolmaǵandyqtan alynyp tastaldy. Qalǵan 238 sáki sý jaǵasynan 50 metrge jyljytyldy.
Búginde munda 6 bioájethana, 160 qoqys jáshigi, jáne 10 kiinýge arnalǵan kabina ornatyldy. Tazalyq jumystaryna 11 tehnika, 80 jumysshy jumyldyrylǵan.
Sonymen qatar jaǵalaýlardyń túbin tazalaý jumystary atqaryldy. Orman sharýashylyǵymen 5 kelisimshart toqtatyldy, politsiia qyzmetkerleri tarapynan 196 quqyqbuzýshylyq anyqtalyp, jalpy 36 hattama toltyrylyp, tiisti aiyppuldar salyndy. 1 demalys ornyna tekserý júrgizilip, talapty buzǵany úshin sotqa material joldandy. Kásipkerler de zań sheńberinde jaýapkershilikke tartylǵan.
Qazirgi ýaqytta jaǵajai aýmaǵyna 16 qutqarýshy bekitilip, qalqymaly qaýipsizdik belgileri ornatylǵan. Jalpy sý qoimasynyń kólemi 5,2 mlrd. tekshe metr. Al uzyndyǵy 80 shaqyrymdy quraidy.
N.Kósherov jaýaptylarǵa qolda bar múmkindikterdi paidalana otyryp, demalýshylarǵa qolaily jaǵdai jasaýdy mindettedi. Shomylý maýsymyn oidaǵydai atqarýdy tapsyrdy.
Aita keteiik, Túrkistan oblysyna kelýshi saiahatshylar sany jyl saiyn artyp keledi. Biylǵy 5 aida Túrkistan óńirindegi tarihi oryndarǵa 424 myń adam saiahattap, ótken jyldyń tiisti kezeńimen salystyrǵanda 9 paiyzǵa artqan. Tabiǵi aýmaqtarǵa saiahattaýshylar sany 58 myńǵa jýyqtap, ótken jyldyń osy kezeńimen salystyrǵanda 2 esege kóbeigen. «E-qonaq» júiesindegi derekterge sáikes, biylǵy 5 aida Túrkistan oblysyna 18699 sheteldik týrist kelgen. Bul – ótken jyldyń tiisti kezeńine qaraǵanda 2 ese kóp. Ásirese, Ózbekstan, Túrkiia, Resei, Qytai, Qyrǵyzstan elderinen saiahatshylar kóp kelgen.
