Saýran aýdany, Oranǵai aýylynda Qazaqstan Respýblikasy Konstitýtsiiasynyń 30 jyldyǵy merekesi qarsańynda 90 oryndyq arnaýly áleýmettik qyzmetter kórsetetin «Shuǵyla» ońaltý ortalyǵy paidalanýǵa berildi. Áleýmettik nysannyń ashylý saltanatyna Túrkistan oblysynyń ákimi Nuralhan Kósherov qatysyp, jergilikti turǵyndardy quttyqtap, bul igi bastamany qoldady,- dep habarlaidy Dalanews.kz
«Shuǵyla» ońaltý ortalyǵynda 3-18 jas aralyǵyndaǵy tirek-qimyl apparaty buzylǵan múmkindigi shekteýli balalar em qabyldaidy. Qurylys jumystary tolyq aiaqtalǵan. Jobanyń jalpy quny - 3 121,7 mln teńge. Munda 90 balaǵa arnaýly áleýmettik kómek kórsetilmek. Onyń 60-y statsionarlyq, 30-y jartylai statsionarlyq negizde. Ortalyq 8 baǵyt boiynsha áleýmettik-turmystyq, meditsinalyq, psihologiialyq, eńbek, pedagogikalyq, mádeni, quqyqtyq jáne áleýmettik-ekonomikalyq qyzmet kórsetedi.
– Sizderdi Qazaqstan Respýblikasy Konstitýtsiiasynyń 30 jyldyǵymen shyn júrekten quttyqtaimyn! Osy mańyzdy mereke qarsańynda oblysta birneshe áleýmettik nysan paidalanýǵa berilýde. Memleket basshysy Qasym-Jomart Kemeluly Toqaev óziniń Joldaýynda: «Biz erekshe qajettilikteri bar adamdar úshin birdei múmkindik jasaýǵa mindettimiz», degen bolatyn. «Shuǵyla» ortalyǵy – osy naqty nietterdiń aiqyn kórinisi bolary anyq. Bul – jai ǵimarat qana emes, bul – balalardyń bolashaǵyna degen úmit, ata-analarǵa senim, qoǵamdaǵy meiirim jáne teń múmkindik mekeni. Dál osyndai Ortalyqtar jyl sońyna deiin oblysymyzdyń eki qalasynda ashylady. Sondyqtan ár balanyń armanyna qanat bitirip, ómirine jaryq syilaý – bizdiń basty mindetimiz. Qurmetti ata-analar, «Shuǵyla» ortalyǵy sizderge senimdi tirek bolady dep senemin, – dedi Nuralhan Kósherov.
Jańa ortalyqqa oblys ákiminiń atynan mýzykalyq aspap (pianino) syiǵa tartyldy.
Ortalyq zamanaýi qural-jabdyqtarmen tolyq qamtamasyz etilgen. Munda kópfýnktsionaldy ústelder, pressoterapiia, qysqa tolqyndy terapiia apparattary, massaj jáne fizioterapiia kabinetteri, sondai-aq montessori, sensorlyq jáne psihomotorika bólmeleri túrli didaktikalyq quraldarmen jabdyqtalǵan. Sonymen qatar syrtqy alańdarda kishi fýtbol, vorkaýt, jazǵy sahna, al ishki keńistikte sport jáne akt zaldary qarastyrylǵan. Múgedektigi bar 1-10 synyp oqýshylaryna arnalǵan oqý kabinetteri de zamanaýi jihazben jabdyqtalǵan.
Dál osyndai ortalyqtar jyl sońyna deiin taǵy eki qalada ashylady. Saryaǵash jáne Túrkistan qalalaryndaǵy 100 oryndyq «Aýtizm ortalyqtary» balalar úshin qyzmet jasaityn bolady.
Aita keteiik, búginde Túrkistan oblysynda 101 405 múgedektigi bar azamat esepte tur. Onyń 15 myńy – balalar men jasóspirimder. Olardyń ishinde 6 736 adam arnaýly áleýmettik qyzmettermen qamtylǵan.
