ساۋران اۋدانى، ورانعاي اۋىلىندا قازاقستان رەسپۋبليكاسى كونستيتۋسياسىنىڭ 30 جىلدىعى مەرەكەسى قارساڭىندا 90 ورىندىق ارناۋلى الەۋمەتتىك قىزمەتتەر كورسەتەتىن «شۇعىلا» وڭالتۋ ورتالىعى پايدالانۋعا بەرىلدى. الەۋمەتتىك نىساننىڭ اشىلۋ سالتاناتىنا تۇركىستان وبلىسىنىڭ اكىمى نۇرالحان كوشەروۆ قاتىسىپ، جەرگىلىكتى تۇرعىنداردى قۇتتىقتاپ، بۇل يگى باستامانى قولدادى،- دەپ حابارلايدى Dalanews.kz
«شۇعىلا» وڭالتۋ ورتالىعىندا 3-18 جاس ارالىعىنداعى تىرەك-قيمىل اپپاراتى بۇزىلعان مۇمكىندىگى شەكتەۋلى بالالار ەم قابىلدايدى. قۇرىلىس جۇمىستارى تولىق اياقتالعان. جوبانىڭ جالپى قۇنى - 3 121،7 ملن تەڭگە. مۇندا 90 بالاعا ارناۋلى الەۋمەتتىك كومەك كورسەتىلمەك. ونىڭ 60-ى ستاسيونارلىق، 30-ى جارتىلاي ستاسيونارلىق نەگىزدە. ورتالىق 8 باعىت بويىنشا الەۋمەتتىك-تۇرمىستىق، مەديسينالىق، پسيحولوگيالىق، ەڭبەك، پەداگوگيكالىق، مادەني، قۇقىقتىق جانە الەۋمەتتىك-ەكونوميكالىق قىزمەت كورسەتەدى.
– سىزدەردى قازاقستان رەسپۋبليكاسى كونستيتۋسياسىنىڭ 30 جىلدىعىمەن شىن جۇرەكتەن قۇتتىقتايمىن! وسى ماڭىزدى مەرەكە قارساڭىندا وبلىستا بىرنەشە الەۋمەتتىك نىسان پايدالانۋعا بەرىلۋدە. مەملەكەت باسشىسى قاسىم-جومارت كەمەل ۇلى توقايەۆ ءوزىنىڭ جولداۋىندا: «ءبىز ەرەكشە قاجەتتىلىكتەرى بار ادامدار ءۇشىن بىردەي مۇمكىندىك جاساۋعا مىندەتتىمىز»، دەگەن بولاتىن. «شۇعىلا» ورتالىعى – وسى ناقتى نيەتتەردىڭ ايقىن كورىنىسى بولارى انىق. بۇل – جاي عيمارات قانا ەمەس، بۇل – بالالاردىڭ بولاشاعىنا دەگەن ءۇمىت، اتا-انالارعا سەنىم، قوعامداعى مەيىرىم جانە تەڭ مۇمكىندىك مەكەنى. ءدال وسىنداي ورتالىقتار جىل سوڭىنا دەيىن وبلىسىمىزدىڭ ەكى قالاسىندا اشىلادى. سوندىقتان ءار بالانىڭ ارمانىنا قانات ءبىتىرىپ، ومىرىنە جارىق سىيلاۋ – ءبىزدىڭ باستى مىندەتىمىز. قۇرمەتتى اتا-انالار، «شۇعىلا» ورتالىعى سىزدەرگە سەنىمدى تىرەك بولادى دەپ سەنەمىن، – دەدى نۇرالحان كوشەروۆ.
جاڭا ورتالىققا وبلىس اكىمىنىڭ اتىنان مۋزىكالىق اسپاپ (پيانينو) سىيعا تارتىلدى.
ورتالىق زاماناۋي قۇرال-جابدىقتارمەن تولىق قامتاماسىز ەتىلگەن. مۇندا كوپفۋنكسيونالدى ۇستەلدەر، پرەسسوتەراپيا، قىسقا تولقىندى تەراپيا اپپاراتتارى، ماسساج جانە فيزيوتەراپيا كابينەتتەرى، سونداي-اق مونتەسسوري، سەنسورلىق جانە پسيحوموتوريكا بولمەلەرى ءتۇرلى ديداكتيكالىق قۇرالدارمەن جابدىقتالعان. سونىمەن قاتار سىرتقى الاڭداردا كىشى فۋتبول، ۆوركاۋت، جازعى ساحنا، ال ىشكى كەڭىستىكتە سپورت جانە اكت زالدارى قاراستىرىلعان. مۇگەدەكتىگى بار 1-10 سىنىپ وقۋشىلارىنا ارنالعان وقۋ كابينەتتەرى دە زاماناۋي جيھازبەن جابدىقتالعان.
ءدال وسىنداي ورتالىقتار جىل سوڭىنا دەيىن تاعى ەكى قالادا اشىلادى. سارىاعاش جانە تۇركىستان قالالارىنداعى 100 ورىندىق «اۋتيزم ورتالىقتارى» بالالار ءۇشىن قىزمەت جاسايتىن بولادى.
ايتا كەتەيىك، بۇگىندە تۇركىستان وبلىسىندا 101 405 مۇگەدەكتىگى بار ازامات ەسەپتە تۇر. ونىڭ 15 مىڭى – بالالار مەن جاسوسپىرىمدەر. ولاردىڭ ىشىندە 6 736 ادام ارناۋلى الەۋمەتتىك قىزمەتتەرمەن قامتىلعان.
