1 qazan – Halyqaralyq qarttar kúni qarsańynda Túrkistan oblysy, Qazyǵurt aýdanynda qazynaly qariialarymyzǵa, aqylgói aqsaqaldarymyzǵa, aq jaýlyqty analarymyzǵa arnalǵan «Belsendi uzaq ómir» ortalyǵynyń ashylý saltanaty jáne merekelik is-sharasy ótti, dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Ataýly is-sharaǵa aýdan ákimi Azizhan Ismailov, aýdandyq Ardagerler keńesi tóraǵasy jáne músheleri, aýdandyq «Ájeler alqasy» qoǵamdyq uiymynyń músheleri, aýdannyń kóptegen zeinetkerleri men aýdan aktivi arnaiy qatysty.
Merekelik shara barysynda aýdan basshysy Azizhan Azimhanuly quttyqtaý sóz sóiledi.
- Ardaqty aǵalar men aq jaýlyqty analar! Tekti jurtymyz ejelden-aq úlkenge qurmet, kishige izet kórsetýdi qanyna sińgen ádet-ǵuryp retinde qalyptastyrǵan. Osy oraida, mereke qarsańynda ashylyp, paidalanýǵa berilip otyrǵan bul ortalyqty, sizderge degen úlken qurmetimiz ben syiymyz dep bilińizder. Babalar jolyn jalǵap, qazirgi qoǵamnyń qisyǵyn túzep, buzyǵyn jónge salyp, aqyl-keńesimen barshaǵa jol kórsetip otyratyn ózderińiz. Barshańyzdy mereili merekemen taǵy da quttyqtai otyryp, otbasylaryńyzǵa amandyq, zor densaýlyq, berekeli uzaq ǵumyr tileimin, – degen aýdan ákimi ystyq yqylasyn bildirdi.
Sondai-aq birneshe qariia qoǵam damýyna qosyp júrgen úlesteri úshin arnaiy aýdan ákiminiń jáne aýdandyq Ardagerler keńesiniń alǵys hattarymen marapattaldy. Merekelik sharaǵa kelgen aǵa býyn ókilderi rizashylyqtaryn bildirip, kóterińki kóńil-kúimen tarqasty.
Aita keteiik, «Belsendi uzaq ómir» ortalyǵy zeinet jasynan asqan qariialarǵa, ardagerlerge qamqorlyq jasaý, qart adamdardyń ómir súrý sapasyn jaqsartý, onyń ishinde bos ýaqytty júieli ótkizýdi uiymdastyrý jáne sol arqyly olardy qoǵamnyń belsendi ómirine tartý baǵytynda jumys isteidi. Ol úshin ortalyqta sportpen ainalysatyn zal, massaj bólmesi, meditsinalyq, psihologiialyq, quqyqtyq kómek bólmeleri, sensorlyq bólme, tuzdy shahta, aq jaýlyqty analarǵa arnalǵan eńbek terapiiasy, iaǵni, tigin tigý kabineti, tennis, biliard ústelderi, doiby jáne emdik sháilarǵa arnalǵan arnaiy bólmeler qarastyrylǵan. Bul ortalyqta 17 adam turaqty jumys istep, aiyna 170, jylyna 2 myń adamǵa deiin qyzmet kórsetedi.
