1 قازان – حالىقارالىق قارتتار كۇنى قارساڭىندا تۇركىستان وبلىسى، قازىعۇرت اۋدانىندا قازىنالى قاريالارىمىزعا، اقىلگوي اقساقالدارىمىزعا، اق جاۋلىقتى انالارىمىزعا ارنالعان «بەلسەندى ۇزاق ءومىر» ورتالىعىنىڭ اشىلۋ سالتاناتى جانە مەرەكەلىك ءىس-شاراسى ءوتتى، دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
اتاۋلى ءىس-شاراعا اۋدان اكىمى ازيزحان يسمايلوۆ، اۋداندىق ارداگەرلەر كەڭەسى ءتوراعاسى جانە مۇشەلەرى، اۋداندىق «اجەلەر القاسى» قوعامدىق ۇيىمىنىڭ مۇشەلەرى، اۋداننىڭ كوپتەگەن زەينەتكەرلەرى مەن اۋدان اكتيۆى ارنايى قاتىستى.
مەرەكەلىك شارا بارىسىندا اۋدان باسشىسى ازيزحان ازيمحان ۇلى قۇتتىقتاۋ ءسوز سويلەدى.
- ارداقتى اعالار مەن اق جاۋلىقتى انالار! تەكتى جۇرتىمىز ەجەلدەن-اق ۇلكەنگە قۇرمەت، كىشىگە ىزەت كورسەتۋدى قانىنا سىڭگەن ادەت-عۇرىپ رەتىندە قالىپتاستىرعان. وسى ورايدا، مەرەكە قارساڭىندا اشىلىپ، پايدالانۋعا بەرىلىپ وتىرعان بۇل ورتالىقتى، سىزدەرگە دەگەن ۇلكەن قۇرمەتىمىز بەن سىيىمىز دەپ بىلىڭىزدەر. بابالار جولىن جالعاپ، قازىرگى قوعامنىڭ قيسىعىن تۇزەپ، بۇزىعىن جونگە سالىپ، اقىل-كەڭەسىمەن بارشاعا جول كورسەتىپ وتىراتىن وزدەرىڭىز. بارشاڭىزدى مەرەيلى مەرەكەمەن تاعى دا قۇتتىقتاي وتىرىپ، وتباسىلارىڭىزعا اماندىق، زور دەنساۋلىق، بەرەكەلى ۇزاق عۇمىر تىلەيمىن، – دەگەن اۋدان اكىمى ىستىق ىقىلاسىن ءبىلدىردى.
سونداي-اق بىرنەشە قاريا قوعام دامۋىنا قوسىپ جۇرگەن ۇلەستەرى ءۇشىن ارنايى اۋدان اكىمىنىڭ جانە اۋداندىق ارداگەرلەر كەڭەسىنىڭ العىس حاتتارىمەن ماراپاتتالدى. مەرەكەلىك شاراعا كەلگەن اعا بۋىن وكىلدەرى ريزاشىلىقتارىن ءبىلدىرىپ، كوتەرىڭكى كوڭىل-كۇيمەن تارقاستى.
ايتا كەتەيىك، «بەلسەندى ۇزاق ءومىر» ورتالىعى زەينەت جاسىنان اسقان قاريالارعا، ارداگەرلەرگە قامقورلىق جاساۋ، قارت ادامداردىڭ ءومىر ءسۇرۋ ساپاسىن جاقسارتۋ، ونىڭ ىشىندە بوس ۋاقىتتى جۇيەلى وتكىزۋدى ۇيىمداستىرۋ جانە سول ارقىلى ولاردى قوعامنىڭ بەلسەندى ومىرىنە تارتۋ باعىتىندا جۇمىس ىستەيدى. ول ءۇشىن ورتالىقتا سپورتپەن اينالىساتىن زال، ماسساج بولمەسى، مەديسينالىق، پسيحولوگيالىق، قۇقىقتىق كومەك بولمەلەرى، سەنسورلىق بولمە، تۇزدى شاحتا، اق جاۋلىقتى انالارعا ارنالعان ەڭبەك تەراپياسى، ياعني، تىگىن تىگۋ كابينەتى، تەننيس، بيليارد ۇستەلدەرى، دويبى جانە ەمدىك ءشايلارعا ارنالعان ارنايى بولمەلەر قاراستىرىلعان. بۇل ورتالىقتا 17 ادام تۇراقتى جۇمىس ىستەپ، ايىنا 170، جىلىنا 2 مىڭ ادامعا دەيىن قىزمەت كورسەتەدى.
