Qazaqstannyń halyq ártisi Nurǵali Núsipjanov teatr jáne kino aktrisasy Gúljamal Qazaqbaevany Halyq ártisi ataǵyn alýymen quttyqtap, júrekjardy tilegin áleýmettik jelidegi paraqshasynda jariialady, dep habarlaidy Malim.kz.
Óner maitalmany quttyqtaý sózinde aktrisanyń qazaq teatr jáne kino ónerine qosqan úlesin erekshe atap ótti. Ol Gúljamal Qazaqbaevanyń shyǵarmashylyq jolynda aianbai eńbek etip, ónerdiń biik shyńyna adal eńbegimen jetkenin aitty.
"Halyq ártisi ataǵyń qaiyrly, qutty bolǵai, qaryndasym! "Butaq iilse, álsiz eken deme, jemisiniń kóptiginen iiledi. Adam iilse, maǵan muqtaj eken deme, tek seni qurmettegendikten iiledi", – degen eken Móńke bi babamyz… Ónerdegi 70 jylymda meniń amandyǵymdy, el-jurt aldyndaǵy abyroiymdy Alladan júrekpen tilegen bir jan bolsa, ol – teatr jáne kino aktrisasy Gúljamal Qazaqbaeva, der edim… Kino álemine de, mártebeli teatr ónerine de aiaýsyz ter tógip kele jatqan aiaýly jandy tóbeme kóterip qalai maqtasam da, qalai maqtansam da qaqym bar…
Ádildik saltanat quryp, Halyq ártisi ataǵyn alǵanyńa shyn qýandym, qalqam. Taban aqy, mańdai terińmen, adal eńbegińmen ónerdiń órin baǵyndyrǵanyńa jan-júregimmen qýandym, qarǵam… Memlekettik eń joǵarǵy marapatyń qaiyrly, qutty bolsyn, qaryndasym! Sen 25 jasyńda jan jaryńnan aiyrylyp, urpaǵyńa jetimdik kórsetpei jetildirdiń, jaryǵym. Kóz jasyń az tógilgen joq. Sol kezde qamqorlyq kórsete almaǵanyma qabyrǵam qaiysady", – dep jazdy Nurǵali Núsipjanov.
Ánshi aktrisamen týǵan jeri Jetisý óńiri arqyly bailanysy bar ekenin de aityp, olardyń bala kezden tanys ekenin jetkizdi. Sonymen qatar ol Gúljamal Qazaqbaevanyń ómirinde qiyn kezeńder bolǵanyn, soǵan qaramastan ónerden qol úzbei, adal eńbek etip kelgenin atap ótti.
