«Alataý media» ortalyǵynda «Túrkistannyń dizain kody» taqyrybynda brifing ótti, dep habarlaidy Dalanews.kz
Brifing barysynda «Túrkistan qalasynyń erekshe mártebesi týraly» Qazaqstan Respýblikasynyń Zańyna sáikes dizain kod resmi túrde tanystyrylyp, onyń negizgi baǵyttary men talaptary túsindirildi.
Dizain kod 8 taraý men 118 tarmaqshadan turatyn talaptar keshenin qamtidy. Onda jalpy erejeler, sáýlet jáne qala qurylysyna qoiylatyn negizgi talaptar, syrtqy kórneki aqparat, kóshe navigatsiiasy júieleri, kóshe jihazy, ǵimarattardyń qasbetteri, qorshaýlar jáne qalalyq keńistikti jaryqtandyrý máseleleri qamtylǵan.
Jobanyń basty maqsaty – Túrkistan qalasynyń mádeni murasyn saqtai otyryp, sáýlet-kórkemdik turǵyda biryńǵai stil qalyptastyrý jáne qolaily qalalyq orta qurý.
Jobanyń negizgi mindetteri retinde qalanyń tarihi jáne jańa qurylystary arasynda úilesimdilik ornatý, ǵimarattardyń qasbetterine biryńǵai sáýlet-kórkemdik talaptardy engizý, áleýmettik osal toptar úshin qoljetimdi orta jasaý, ekologiialyq jáne tehnologiialyq sheshimderdi qoldaný jáne qoldanystaǵy normativtik bazany jańǵyrtý kózdelip otyr.
Brifingte jańa Dizain kodtyń zamanaýi talaptarǵa sai ekenin, tarihi muraǵa ziian keltirmei, qala turǵyndary men qonaqtary úshin yńǵaily ári qaýipsiz orta qalyptastyrýǵa baǵyttalǵan mańyzdy qujat ekeni aityldy.
Jiyn sońynda spikerler Dizain kodtyń iske asyrylý tetikteri, qala qurylysyna yqpaly jáne onyń turǵyndar men kásipkerler úshin mańyzy týraly qoiylǵan suraqtarǵa jaýap berdi.
