«الاتاۋ مەديا» ورتالىعىندا «تۇركىستاننىڭ ديزاين كودى» تاقىرىبىندا بريفينگ ءوتتى، دەپ حابارلايدى Dalanews.kz
بريفينگ بارىسىندا «تۇركىستان قالاسىنىڭ ەرەكشە مارتەبەسى تۋرالى» قازاقستان رەسپۋبليكاسىنىڭ زاڭىنا سايكەس ديزاين كود رەسمي تۇردە تانىستىرىلىپ، ونىڭ نەگىزگى باعىتتارى مەن تالاپتارى ءتۇسىندىرىلدى.
ديزاين كود 8 تاراۋ مەن 118 تارماقشادان تۇراتىن تالاپتار كەشەنىن قامتيدى. وندا جالپى ەرەجەلەر، ساۋلەت جانە قالا قۇرىلىسىنا قويىلاتىن نەگىزگى تالاپتار، سىرتقى كورنەكى اقپارات، كوشە ناۆيگاسياسى جۇيەلەرى، كوشە جيھازى، عيماراتتاردىڭ قاسبەتتەرى، قورشاۋلار جانە قالالىق كەڭىستىكتى جارىقتاندىرۋ ماسەلەلەرى قامتىلعان.
جوبانىڭ باستى ماقساتى – تۇركىستان قالاسىنىڭ مادەني مۇراسىن ساقتاي وتىرىپ، ساۋلەت-كوركەمدىك تۇرعىدا ءبىرىڭعاي ستيل قالىپتاستىرۋ جانە قولايلى قالالىق ورتا قۇرۋ.
جوبانىڭ نەگىزگى مىندەتتەرى رەتىندە قالانىڭ تاريحي جانە جاڭا قۇرىلىستارى اراسىندا ۇيلەسىمدىلىك ورناتۋ، عيماراتتاردىڭ قاسبەتتەرىنە ءبىرىڭعاي ساۋلەت-كوركەمدىك تالاپتاردى ەنگىزۋ، الەۋمەتتىك وسال توپتار ءۇشىن قولجەتىمدى ورتا جاساۋ، ەكولوگيالىق جانە تەحنولوگيالىق شەشىمدەردى قولدانۋ جانە قولدانىستاعى نورماتيۆتىك بازانى جاڭعىرتۋ كوزدەلىپ وتىر.
بريفينگتە جاڭا ديزاين كودتىڭ زاماناۋي تالاپتارعا ساي ەكەنىن، تاريحي مۇراعا زيان كەلتىرمەي، قالا تۇرعىندارى مەن قوناقتارى ءۇشىن ىڭعايلى ءارى ءقاۋىپسىز ورتا قالىپتاستىرۋعا باعىتتالعان ماڭىزدى قۇجات ەكەنى ايتىلدى.
جيىن سوڭىندا سپيكەرلەر ديزاين كودتىڭ ىسكە اسىرىلۋ تەتىكتەرى، قالا قۇرىلىسىنا ىقپالى جانە ونىڭ تۇرعىندار مەن كاسىپكەرلەر ءۇشىن ماڭىزى تۋرالى قويىلعان سۇراقتارعا جاۋاپ بەردى.
