Túrkistan oblysynyń logotipine baiqaý jariialandy
Baiqaýdyń maqsaty – Elbasy Jarlyǵymen qurylǵan Túrkistan oblysy ákimdiginiń jańa logotipin qalyptastyrý. Sol tóltańba arqyly Túrkistannyń brendin qalyptastyryp, Qazaqstan men shetelge tanytý jáne ǵalamtor jelisinde ózine tán oń imidjin kóterý de kózdelgen.
Bul tóltańbada oblystyń ótkeni men búgini, óńirdiń ózine tán ereksheligi, qazaq halqynyń ulttyq bolmysy kórinis taýyp, dizainerlik sheberlikpen úilesýi tiis. Sapaly ári tartymdy logotip týrizmdi damytýda jáne investitsiia tartýda da mańyzdy mindet atqarady.
Baiqaýǵa dizainerler, sýretshiler jáne kez kelgen yntaly áleýmettik jeli qoldanýshylary qatysa alady. Baiqaýǵa qatysýshylar Facebook áleýmettik jelisinde Túrkistan oblysynyń tóltańbasyna qatysty óziniń avtorlyq jumysyn JPEG formatynda beinelep, jumysy týraly qysqasha túsindirip (video nusqa da quptalady) post jazýy tiis. Baiqaýǵa 2018 jyldyń 14 qarashasy men 20 jeltoqsany aralyǵynda jariialanǵan materialdar qabyldanady.
Qatysýshy óziniń áleýmettik jelidegi jeke paraqshasynda post jazyp, #Túrkistanoblysynyńtóltańbasy heshtegimen bólisedi. Jariialanǵan posttardyń skrinshottaryn (laik, pikirleri, repost tolyq kórinýi tiis) arnaiy fail papkasyna jinaqtap, avtorlyq tóltańba jobasyn kompiýterlik keskindeme (3D) nemese JPEG formatynda ontustikonimi@yandex.kz elektrondy poshtasyna joldaýy tiis jáne 2018 jyldyń 20 jeltoqsanyna deiin Túrkistan oblysynyń ishki saiasat basqarmasyna tapsyrýy qajet.
Baiqaý jeńimpazyn bilikti sýretshiler men dizainerlerden, BAQ ókilderinen, memlekettik mekemeler jáne úkimettik emes uiym múshelerinen quralǵan arnaiy komissiia anyqtaidy. Júldegerler qarjylai baǵaly syilyqtarmen marapattalady. Baiqaýdyń qorytyndysy 2018 jyldyń jeltoqsan aiynyń úshinshi onkúndiginde jariialanady.
Túrkistan oblysy ákiminiń baspasóz qyzmeti
