بايقاۋدىڭ ماقساتى – ەلباسى جارلىعىمەن قۇرىلعان تۇركىستان وبلىسى اكىمدىگىنىڭ جاڭا لوگوتيپىن قالىپتاستىرۋ. سول ءتولتاڭبا ارقىلى تۇركىستاننىڭ برەندىن قالىپتاستىرىپ، قازاقستان مەن شەتەلگە تانىتۋ جانە عالامتور جەلىسىندە وزىنە ءتان وڭ ءيميدجىن كوتەرۋ دە كوزدەلگەن.
بۇل ءتولتاڭبادا وبلىستىڭ وتكەنى مەن بۇگىنى، ءوڭىردىڭ وزىنە ءتان ەرەكشەلىگى، قازاق حالقىنىڭ ۇلتتىق بولمىسى كورىنىس تاۋىپ، ديزاينەرلىك شەبەرلىكپەن ۇيلەسۋى ءتيىس. ساپالى ءارى تارتىمدى لوگوتيپ ءتۋريزمدى دامىتۋدا جانە ينۆەستيسيا تارتۋدا دا ماڭىزدى مىندەت اتقارادى.
بايقاۋعا ديزاينەرلەر، سۋرەتشىلەر جانە كەز كەلگەن ىنتالى الەۋمەتتىك جەلى قولدانۋشىلارى قاتىسا الادى. بايقاۋعا قاتىسۋشىلار Facebook الەۋمەتتىك جەلىسىندە تۇركىستان وبلىسىنىڭ ءتولتاڭباسىنا قاتىستى ءوزىنىڭ اۆتورلىق جۇمىسىن JPEG فورماتىندا بەينەلەپ، جۇمىسى تۋرالى قىسقاشا ءتۇسىندىرىپ (ۆيدەو نۇسقا دا قۇپتالادى) پوست جازۋى ءتيىس. بايقاۋعا 2018 جىلدىڭ 14 قاراشاسى مەن 20 جەلتوقسانى ارالىعىندا جاريالانعان ماتەريالدار قابىلدانادى.
قاتىسۋشى ءوزىنىڭ الەۋمەتتىك جەلىدەگى جەكە پاراقشاسىندا پوست جازىپ، #تۇركىستانوبلىسىنىڭتولتاڭباسى حەشتەگىمەن بولىسەدى. جاريالانعان پوستتاردىڭ سكرينشوتتارىن (لايك، پىكىرلەرى، رەپوست تولىق كورىنۋى ءتيىس) ارنايى فايل پاپكاسىنا جيناقتاپ، اۆتورلىق ءتولتاڭبا جوباسىن كومپيۋتەرلىك كەسكىندەمە (3D) نەمەسە JPEG فورماتىندا ontustikonimi@yandex.kz ەلەكتروندى پوشتاسىنا جولداۋى ءتيىس جانە 2018 جىلدىڭ 20 جەلتوقسانىنا دەيىن تۇركىستان وبلىسىنىڭ ىشكى ساياسات باسقارماسىنا تاپسىرۋى قاجەت.
بايقاۋ جەڭىمپازىن بىلىكتى سۋرەتشىلەر مەن ديزاينەرلەردەن، ب ا ق وكىلدەرىنەن، مەملەكەتتىك مەكەمەلەر جانە ۇكىمەتتىك ەمەس ۇيىم مۇشەلەرىنەن قۇرالعان ارنايى كوميسسيا انىقتايدى. جۇلدەگەرلەر قارجىلاي باعالى سىيلىقتارمەن ماراپاتتالادى. بايقاۋدىڭ قورىتىندىسى 2018 جىلدىڭ جەلتوقسان ايىنىڭ ءۇشىنشى ونكۇندىگىندە جاريالانادى.
تۇركىستان وبلىسى اكىمىنىڭ باسپا ءسوز قىزمەتى
