Túrkistan oblysynyń aýmaǵynda ornalasqan eldi mekenderdi joǵary jyldamdyqty úi jaǵdaiyndaǵy internetpen qamtý jumystary júrgizilip keledi. Osy saladaǵy jumystar men máseleler oblys ákimi Darhan Satybaldynyń tóraǵalyǵymen ótken apparat májilisinde keńinen talqylandy, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
– Biz turǵyndardyń ómir sapasyn jaqsartý jáne aýyldardyń áleýetin arttyrý úshin bar múmkindikti qarastyrýymyz kerek. Ásirese aýyldyq eldi mekenderdi joǵary jyldamdyqty internetpen qamtý qajet. Bul ekonomikalyq, bilim berý, meditsinalyq jáne ǵylymi salalardyń damýyna eleýli yqpal etedi dep sanaimyn. Jańadan qurylysy júrgizilip jatqan turǵyn úilerde bailanys jelilerin birden ornatýdy tapsyramyn, – dedi Darhan Satybaldy.
Jiyn barysynda Túrkistan oblysynyń tsifrlandyrý, memlekettik qyzmetter kórsetý jáne arhivter basqarmasynyń basshysy Marat Ainabekov baiandama jasady. Ol óńirdi ǵalamtormen qamtý baǵytyndaǵy jumystar men máselelerdi atap ótti.
Óńirdegi jalpy 807 eldi mekenniń qazirgi tańda 415-i joǵary jyldamdyqty talshyqty-optikalyq bailanys jelisimen qamtylǵan. Onyń ishinde 305-i memlekettik-jekeshelik áriptestik jobasymen júzege asty. «Qazaqtelekom» tarapynan 177-sine jáne «Transtelekom» tarapynan 128-ine optika júrgizilgen. Oblysta internet jyldamdyǵyn arttyrý, eldi mekender men bilim uialaryn sapaly ǵalamtormen qamtý jumystary jalǵasady.
