Tatarstan Respýblıkasyna jumys saparymen barǵan Túrkistan oblysynyń ákimi Darhan Satybaldy bastaǵan delegasıa ondaǵy óndiris oryndaryn aralap, birqatar kásiporyn jumysymen tanysty. Sapardyń negizgi maqsaty – eki jaqty baılanystardy nyǵaıtý, seriktestik qatynastardy keńeıtý, yntymaqtastyqty damytý. Investısıa tartý, óndiris, aýyl sharýashylyǵy men İT salasynda tájirıbe almasý, dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.
Osy maqsatta oblys delegasıasy "Hımgrad" tehnopolısi-zamanaýı ındýstrıaldy hımıalyq parkinde boldy. Ondaǵy óndiris oryndarynyń jumysymen tanysty. Zamanaýı ındýstrıaldy hımıalyq park jekeshelik -memlekettik qaǵıdattarda jumys isteıdi. 2007 - 2023 jyldar aralyǵynda memlekettik ınvestısıanyń kólemi 2,4 mıllıard rúbldi quraǵan. Búdjet qarajaty ınfraqurylymmen qamtýǵa baǵyttalady. Jeke ınvestısıalardyń jalpy kólemi 25,2 mlrd rúblden asqan. Munda jeke ınvestısıalyq jobalar júzege asady. Tehnopolıs aýmaǵynda ornalasqan jalpy sany 400-ge jýyq kompanıada 10 558 adam jumys isteıdi.
Jalpy aýdany 130 gektardy quraıtyn óndiris aýmaǵy ınfraqurylymmen qamtylǵan, 3 myń shaqyrymnan asatyn temir joly bar. Hımıa, polımerlerdi qaıta óńdeý, nanotehnologıa, bıotehnologıa, resýrs únemdeý, energıa tıimdiligi, medısınalyq tehnologıalar salalary boıynsha jobalar júzege asqan.
Sondaı-aq búgin óńir basshysy bastaǵan jumys toby tájirıbe almasý maqsatynda Bashır Rameev atyndaǵy İT parkke arnaıy bardy. Park bazasynda kovorkıng, sıfrlyq kitaphana, balalar tehnoparki, startap hab, kıberpark arenasy jáne taǵy basqa jobalar bar. 10 jyldan astam ýaqyt ishinde 700-den astam joba qurylǵan. "Kompúter atasy” atanǵan keńestik ǵalym-ónertapqysh atyndaǵy keshenniń rezıdentteri İT salasy boıynsha ádemdegi eń bedeldi baıqaýlarda top jaryp júr.
Sıfrly álem adamnyń kúndelikti ómirin ózgertýge, ómir sapasyn jaqsartýǵa kómektesedi. Dál osy salany damytýǵa baǵyttalǵan “21 mektep” ortalyǵy osy naryqqa maman daıyndaıdy.
Túrkistan oblysynyń ákimi Darhan Satybaldy bastaǵan delegasıaǵa jańa múmkindikter men salany damytý baǵyttary tanystyryldy.
Zaman talabyna saı qazirgi tańda álem boıynsha İT salasyna suranys artýda. Túrkistan oblysy IT sektoryn damytý úshin belsendi jumys istep jatyr. Ásirese, aýyl sharýashylyǵyndaǵy ozyq tehnologıalar men jobalarǵa basymdyq beriledi.
