تۇركىستان وبلىسىنىڭ دەلەگاسياسى تاتارستانداعى ءوندىرىس وشاقتارىمەن تانىستى

Dalanews 24 ماۋ. 2024 09:22 1730

تاتارستان رەسپۋبليكاسىنا جۇمىس ساپارىمەن بارعان تۇركىستان وبلىسىنىڭ اكىمى دارحان ساتىبالدى باستاعان دەلەگاسيا ونداعى ءوندىرىس ورىندارىن ارالاپ، ءبىرقاتار كاسىپورىن جۇمىسىمەن تانىستى. ساپاردىڭ نەگىزگى ماقساتى – ەكى جاقتى بايلانىستاردى نىعايتۋ، سەرىكتەستىك قاتىناستاردى كەڭەيتۋ، ىنتىماقتاستىقتى دامىتۋ. ينۆەستيسيا تارتۋ، ءوندىرىس، اۋىل شارۋاشىلىعى مەن ءىت سالاسىندا تاجىريبە الماسۋ، دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.

وسى ماقساتتا وبلىس دەلەگاسياسى "حيمگراد" تەحنوپوليسى-زاماناۋي يندۋستريالدى حيميالىق پاركىندە بولدى. ونداعى ءوندىرىس ورىندارىنىڭ جۇمىسىمەن تانىستى. زاماناۋي يندۋستريالدى حيميالىق پارك جەكەشەلىك -مەملەكەتتىك قاعيداتتاردا جۇمىس ىستەيدى. 2007 - 2023 جىلدار ارالىعىندا مەملەكەتتىك ينۆەستيسيانىڭ كولەمى 2،4 ميلليارد ءرۋبلدى قۇراعان. بيۋدجەت قاراجاتى ينفراقۇرىلىممەن قامتۋعا باعىتتالادى. جەكە ينۆەستيسيالاردىڭ جالپى كولەمى 25،2 ملرد رۋبلدەن اسقان. مۇندا جەكە ينۆەستيسيالىق جوبالار جۇزەگە اسادى. تەحنوپوليس اۋماعىندا ورنالاسقان جالپى سانى 400-گە جۋىق كومپانيادا 10 558 ادام جۇمىس ىستەيدى.

جالپى اۋدانى 130 گەكتاردى قۇرايتىن ءوندىرىس اۋماعى ينفراقۇرىلىممەن قامتىلعان، 3 مىڭ شاقىرىمنان اساتىن تەمىر جولى بار. حيميا، پوليمەرلەردى قايتا وڭدەۋ، نانوتەحنولوگيا، بيوتەحنولوگيا، رەسۋرس ۇنەمدەۋ، ەنەرگيا تيىمدىلىگى، مەديسينالىق تەحنولوگيالار سالالارى بويىنشا جوبالار جۇزەگە اسقان.

سونداي-اق بۇگىن ءوڭىر باسشىسى باستاعان جۇمىس توبى تاجىريبە الماسۋ ماقساتىندا باشير رامەيەۆ اتىنداعى ءىت پارككە ارنايى باردى. پارك بازاسىندا كوۆوركينگ، سيفرلىق كىتاپحانا، بالالار تەحنوپاركى، ستارتاپ حاب، كيبەرپارك ارەناسى جانە تاعى باسقا جوبالار بار. 10 جىلدان استام ۋاقىت ىشىندە 700-دەن استام جوبا قۇرىلعان. "كومپيۋتەر اتاسى” اتانعان كەڭەستىك عالىم-ونەرتاپقىش اتىنداعى كەشەننىڭ رەزيدەنتتەرى ءىت سالاسى بويىنشا ادەمدەگى ەڭ بەدەلدى بايقاۋلاردا توپ جارىپ ءجۇر.
سيفر­لى الەم ادامنىڭ كۇندەلىكتى ءومىرىن وزگەرتۋگە، ءومىر ساپاسىن جاقسارتۋعا كومەكتەسەدى. ءدال وسى سالانى دامىتۋعا باعىتتالعان “21 مەكتەپ” ورتالىعى وسى نارىققا مامان دايىندايدى.

تۇركىستان وبلىسىنىڭ اكىمى دارحان ساتىبالدى باستاعان دەلەگاسياعا جاڭا مۇمكىندىكتەر مەن سالانى دامىتۋ باعىتتارى تانىستىرىلدى.
زامان تالابىنا ساي قازىرگى تاڭدا الەم بويىنشا ءىت سالاسىنا سۇرانىس ارتۋدا. تۇركىستان وبلىسى IT سەكتورىن دامىتۋ ءۇشىن بەلسەندى جۇمىس ىستەپ جاتىر. اسىرەسە، اۋىل شارۋاشىلىعىنداعى وزىق تەحنولوگيالار مەن جوبالارعا باسىمدىق بەرىلەدى.


ۇسىنىلعان
سوڭعى جاڭالىقتار