Qos aýdan, qala turǵyndarynyń qýanyshymen bólisýge barǵan oblys ákimi Janseıit Túımebaev, aldymen, Ordabasy aýdanyna at basyn buryp, Shubarsý aýylyndaǵy «MEDICAL CENTER SHUBARSU» medısına ortalyǵynyń saltanatty ashylý rásimine kýá boldy.
Qurylysy 2016 jyly bastalǵan nysanda jalpy sany 115 stansıonarlyq tósek oryn bar. Medısına ortalyǵynda terapıa, balalar bólimi, hırýrgıa jáne jaraqat bólimi, fızoterapıa jáne ońaltý bólimi, kúndizgi bólim, stasıonar, zerthana jáne dıagnostıka bólimi, jedel járdem stansasy qyzmet kórsetedi. AQSH, Ońtistik Koreıa, Vengrıa, Japonıa, Germanıa jáne bir qatar sheteldik jáne otandyq zamanýı medısınalyq quraldarmen jabdyqtalǵan nysanda 145 adam jumyspen qamtylǵan.
Munan soń, oblys basshylyǵy bastaǵan top aýdan ortalyǵy – Temirlandaǵy «Jastar saraıynyń» ashylýyna qatysty. Búginde 20 shaqty jas mamandy jumyspen qamtyǵan ǵımaratta bolashaqta aýdan jastary túrli úıirmelerge qatysyp, bos ýaqytyn tıimdi paıdalanatyn bolady.
– Táýelsizdiktiń torqaly toıynda Ordabasyda halyqqa óte qajetti eki nysan el ıgiligine berilip otyr. Onyń biri - jańa ózimiz kýá bolǵan medısınalyq ortalyq bolsa, ekinshisi jastar úshin boı kóterip, jumysyn bastaǵan osynaý eńseli ǵımarat. Barshańyzǵa belgili, keler 2019 jyldy Elbasymyz "Jastar jyly" dep jarıalady. Iaǵnı, keleshegi kemel jastarymyzǵa memleket tarapynan barlyq jaǵdaıdy jasaý jolynda búgingi ortalyq Ózderińizge amanat. Táýelsiz elimizdiń máńgilik el bolýǵa umtylǵan úmitin jalǵaıtyn, sol armanǵa jetkizetin de Ózderińiz. Maqsat-murattarymyzdyń júzege asýynda búgingi jastar saraıynyń Sizderge tıgizer paıdasy mol dep bilem, – dedi J.Túımebaev ondaǵy jalyndy jastarmen tildeskende.
Temirlan aýylyndaǵy eski kınoteatr ǵımaraty 2014 jyly jergilikti búdjet esebinen jeke menshikten satyp alynǵan-dy. Sol kezde aýdan ákiminiń qaýlysymen nysan aýdandyq "Jastar resýrstyq ortalyǵy" komýnaldyq memlekettik mekemesiniń teńgerimine ótip, kúrdeli jóndeýden ótti. Búginde jańarǵan nysan tehnıkalyq bazamen tolyqtaı qamtamasyz etilgen.
Oblys ákimi Ordabasyǵa saparynan keıin Kentaý qalasynda jańa páterlerge ıe bolǵan jergilikti turǵyndardyń qýanyshymen bólisýge bardy. Bul kúni ondaǵy Eski Iqan aýyldyq okrýginde 2 qabatty 10 páterli qyzmettik turǵyn úı óz qojaıyndaryn tapsa, Shaǵa aýyldyq okrýgine qarasty Yntymaq aýylynda da 10 páterli 2 turǵyn úıdiń kilti berilip, bul kúni Kentaýda jalpy sany 30 páter ıelerine tabystaldy.
Qyzmettik úılerdiń kiltin alyp, qýanyshqa bólengen jergilikti halyqpen ózara áńgimede Janseıit Qanseıituly mundaı baspanalardyń osynaý meıram qarsańynda oblystaǵy kóptegen azamatqa, naqtyraq aıtsaq 300-den astam turǵynǵa tabystalǵan jetkizdi. Halyqty baspanamen qamtý jumystary budan ári de jalǵasa beretinin aıtqan ákim úılerdiń qutty qonysqa aınalýyna tilektestigin bildirdi.
Túrkistan oblysy ákiminiń baspasóz qyzmeti
