قوس اۋدان، قالا تۇرعىندارىنىڭ قۋانىشىمەن بولىسۋگە بارعان وبلىس اكىمى جانسەيىت تۇيمەبايەۆ، الدىمەن، ورداباسى اۋدانىنا ات باسىن بۇرىپ، شۇبارسۋ اۋىلىنداعى «MEDICAL CENTER SHUBARSU» مەديسينا ورتالىعىنىڭ سالتاناتتى اشىلۋ راسىمىنە كۋا بولدى.
قۇرىلىسى 2016 جىلى باستالعان نىساندا جالپى سانى 115 ستانسيونارلىق توسەك ورىن بار. مەديسينا ورتالىعىندا تەراپيا، بالالار ءبولىمى، حيرۋرگيا جانە جاراقات ءبولىمى، فيزوتەراپيا جانە وڭالتۋ ءبولىمى، كۇندىزگى ءبولىم، ستاسيونار، زەرتحانا جانە دياگنوستيكا ءبولىمى، جەدەل جاردەم ستانساسى قىزمەت كورسەتەدى. اقش، وڭتىستىك كورەيا، ۆەنگريا، جاپونيا، گەرمانيا جانە ءبىر قاتار شەتەلدىك جانە وتاندىق زامانۋي مەديسينالىق قۇرالدارمەن جابدىقتالعان نىساندا 145 ادام جۇمىسپەن قامتىلعان.
مۇنان سوڭ، وبلىس باسشىلىعى باستاعان توپ اۋدان ورتالىعى – تەمىرلانداعى «جاستار سارايىنىڭ» اشىلۋىنا قاتىستى. بۇگىندە 20 شاقتى جاس ماماندى جۇمىسپەن قامتىعان عيماراتتا بولاشاقتا اۋدان جاستارى ءتۇرلى ۇيىرمەلەرگە قاتىسىپ، بوس ۋاقىتىن ءتيىمدى پايدالاناتىن بولادى.
– تاۋەلسىزدىكتىڭ تورقالى تويىندا ورداباسىدا حالىققا وتە قاجەتتى ەكى نىسان ەل يگىلىگىنە بەرىلىپ وتىر. ونىڭ ءبىرى - جاڭا ءوزىمىز كۋا بولعان مەديسينالىق ورتالىق بولسا، ەكىنشىسى جاستار ءۇشىن بوي كوتەرىپ، جۇمىسىن باستاعان وسىناۋ ەڭسەلى عيمارات. بارشاڭىزعا بەلگىلى، كەلەر 2019 جىلدى ەلباسىمىز "جاستار جىلى" دەپ جاريالادى. ياعني، كەلەشەگى كەمەل جاستارىمىزعا مەملەكەت تاراپىنان بارلىق جاعدايدى جاساۋ جولىندا بۇگىنگى ورتالىق وزدەرىڭىزگە امانات. تاۋەلسىز ەلىمىزدىڭ ماڭگىلىك ەل بولۋعا ۇمتىلعان ءۇمىتىن جالعايتىن، سول ارمانعا جەتكىزەتىن دە وزدەرىڭىز. ماقسات-مۇراتتارىمىزدىڭ جۇزەگە اسۋىندا بۇگىنگى جاستار سارايىنىڭ سىزدەرگە تيگىزەر پايداسى مول دەپ بىلەم، – دەدى ج.تۇيمەبايەۆ ونداعى جالىندى جاستارمەن تىلدەسكەندە.
تەمىرلان اۋىلىنداعى ەسكى كينوتەاتر عيماراتى 2014 جىلى جەرگىلىكتى بيۋدجەت ەسەبىنەن جەكە مەنشىكتەن ساتىپ الىنعان-دى. سول كەزدە اۋدان اكىمىنىڭ قاۋلىسىمەن نىسان اۋداندىق "جاستار رەسۋرستىق ورتالىعى" كوممۋنالدىق مەملەكەتتىك مەكەمەسىنىڭ تەڭگەرىمىنە ءوتىپ، كۇردەلى جوندەۋدەن ءوتتى. بۇگىندە جاڭارعان نىسان تەحنيكالىق بازامەن تولىقتاي قامتاماسىز ەتىلگەن.
وبلىس اكىمى ورداباسىعا ساپارىنان كەيىن كەنتاۋ قالاسىندا جاڭا پاتەرلەرگە يە بولعان جەرگىلىكتى تۇرعىنداردىڭ قۋانىشىمەن بولىسۋگە باردى. بۇل كۇنى ونداعى ەسكى يقان اۋىلدىق وكرۋگىندە 2 قاباتتى 10 پاتەرلى قىزمەتتىك تۇرعىن ءۇي ءوز قوجايىندارىن تاپسا، شاعا اۋىلدىق وكرۋگىنە قاراستى ىنتىماق اۋىلىندا دا 10 پاتەرلى 2 تۇرعىن ءۇيدىڭ كىلتى بەرىلىپ، بۇل كۇنى كەنتاۋدا جالپى سانى 30 پاتەر يەلەرىنە تابىستالدى.
قىزمەتتىك ۇيلەردىڭ كىلتىن الىپ، قۋانىشقا بولەنگەن جەرگىلىكتى حالىقپەن ءوزارا اڭگىمەدە جانسەيىت قانسەيىت ۇلى مۇنداي باسپانالاردىڭ وسىناۋ مەيرام قارساڭىندا وبلىستاعى كوپتەگەن ازاماتقا، ناقتىراق ايتساق 300-دەن استام تۇرعىنعا تابىستالعان جەتكىزدى. حالىقتى باسپانامەن قامتۋ جۇمىستارى بۇدان ءارى دە جالعاسا بەرەتىنىن ايتقان اكىم ۇيلەردىڭ قۇتتى قونىسقا اينالۋىنا تىلەكتەستىگىن ءبىلدىردى.
تۇركىستان وبلىسى اكىمىنىڭ باسپا ءسوز قىزمەتى
