Ózbekáli Jánibekov atyndaǵy OQPÝ-dyń N.P.Podýshkin atyndaǵy arheologiia ortalyǵynyń basshysy, t.ǵ.d., professor A.N.Podýshkinniń jetekshiligimen Sozaq aýdany, Qumkent aýyldyq okrýgine qarasty, Qyzylkól aýylyndaǵy «Qyzylkól» tarihi-mádeni aimaǵynda statsionarlyq qazba jumystaryn júrgizildi, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Biylǵy arheologiialyq qazba jumystaryna ýniversitet ortalyǵynyń qyzmetkerelinen bólek, «Ordabasy» ulttyq tarihi-mádeni qoryǵynyń jáne Qazaqstan Respýblikasynyń Memlekettik Ortalyq mýzeiiniń qyzmetkerleri de qatysty.
Bul aimaqta birneshe mańyzdy arheologiialyq eskertkishter, sonyń ishinde Aqtóbe (qyzylkóldik) qonysy, 200-den astam qorǵan men Shoshaqtóbe dep atalatyn ǵibadathana ornalasqan. Qyzylkól kóliniń tóńireginde shoǵyrlanǵan Qyzylseńgir biiktiginde de qorǵandar bar. Ǵibadathananyń pishini konýs tárizdi, neogendik qyzyl tústi topyraqtan quralǵan. Konýstyń parametrleri: negizi diametri 200-240 metr, biiktigi 18-20 metr. Konýstyń joǵarǵy bóliginde mólsheri 30-22 metr jáne biiktigi shamamen 2-2,5 metr bolatyn qoldan jasalyp, basqa tústi balshyqtan jaǵylǵan jasandy stilobat qalanǵan. Onda 0,5-0,7 metr shamasynda saqtalǵan biiktikte kólemi 17-15 metr tas qabyrǵadan jasalǵan tik buryshty qurylys ornalasqan. Qabyrǵalar arasy tastarmen qalanǵan jáne ýaqyt óte tastar bólmelerge qulaǵandyǵy kórinedi.
Ǵibadathananyń mańyndaǵy jerdiń joǵary qabatynda myńnan asa keramikanyń bólikteri, sonymen qosa diirmen tastar, dán úkkish, qairaq tastar jatyr. Sonymen birge ydys, qumyra, tostaǵan tabylǵan. Boljam boiynsha ǵibadathanada dini ǵuryptar ótkizilgen.
Professor tek qazba jumystarymen ainalysyp qoimai, sol óńirdiń tarihyn keń kólemde nasihattaý maqsatynda jergilikti mektepterde dáris oqýdy dástúrge ainaldyrǵan. Bul joly Qyzylkól aýylynda ornalasqan M.Áýezov atyndaǵy shaǵyn jinaqty jalpy orta mektebinde «Qyzylkól tarihy» taqyrybynda dáris oqydy. Sabaq barysynda mektep oqýshylary kókeidegi suraqtaryna jaýap aldy. Aitylǵan málimetterge dálel retinde ári zattai derek retinde oqýshylar nazaryna biylǵy maýsymda tabylǵan jádigerlerden kórme jasaqtaldy. Óz óńiriniń tarihyn bilip, kóne jádigerlerdi qolymen ustap kórgen oqýshylarǵa ólke tarihynyń eskertkishterine ekskýrsiia uiymdastyryldy.
