Túrkistan oblysynda turǵyndardy arendalyq úimen qamtý jumysy jalǵasýda. 2024 jyldyń jospary boiynsha oblys kóleminde 2590 páterli arendalyq turǵyn úilerdi satyp alýǵa 47,5 mlrd. teńge bólingen. Bólingen qarjyǵa oblys boiynsha 191 myń sharshy metrden asatyn 247 kópqabatty turǵyn úi satyp alý kózdelgen, dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Oblys ákimi Darhan Satybaldynyń tóraǵalyǵymen ótken májiliste turǵyn úilerdiń qurylys barysy pysyqtalyp, máseleler talqylandy. Óńir basshysy jumysty durys úilestire almaǵan aýdan, qala ákimderi men basqarma basshylaryna jáne merdigerlerge syn-eskertpe aityp, jumysty shiratýdy tapsyrdy.
– Úilerdiń qurylysy sapaly ári ýaqtyly aiaqtalýy tiis. Men jumystardy qysqa deiin bitirýdi tapsyrǵanmyn. Biýdjet qarjysyn tiimdi igerip, úilerdi jyl sońyna deiin tolyq tapsyryńyzdar. Bul úilerdi el kútip otyr. Talai turǵyn úi kezeginde tur. Sondyqtan jumysty jaýapkershilikpen atqaryńyzdar. Úilerdiń qasbetin bir úlgide jasaý máselesi nazardan túspeýi tiis. Abattandyrý jumystaryn da sapaly oryndaý qajet, – dedi Darhan Satybaldy.
Túrkistan oblystyq qurylys basqarmasy basshysynyń mindetin atqarýshy Abai Turhanovtyń aitýynsha, búgingi tańda 935 páter satyp alynǵan (Jetisai – 2, Qazyǵurt – 16, Maqtaaral – 43, Ordabasy – 12, Sozaq – 24, Shardara – 24, Kentaý – 30, Túrkistan – 768, Saýran – 16). Josparǵa sáikes qarasha aiynda 616 páter, al jeltoqsan aiynda 1039 páter satyp alynady dep kútilip otyr. Bul nysandardyń qurylysy qatań baqylaýǵa alynǵan.
Qurylys jumystary 12 aýdanda (882 páter) qarqyndy júrgizilýde. Negizgi jumystary aiaqtalyp, árleý jumystary 80% atqarylǵan. Al 3 aýdanda 4 úidiń (88 páter) qurylys qarqyny tómen. Atap aitqanda, Báidibek, Sairam jáne Saýran aýdandaryndaǵy ǵimarattar kesteden keshigip jatyr. Atalǵan aýdandardyń ákimderine tiisti syn-eskertpe aitylyp, jumysty shiratý tapsyryldy. Jumysshylar sanyń kóbeitip, qurylysty eki aýysymda uiymdastyrý mindetteldi.
Túrkistan qalasynda 20 úi, jalpy 1716 páterdiń qurylys jumystary atqarylýda. Onyń ishinde 16 úidi (1376 páter) jyl sońyna deiin satyp alý josparlanǵan. Shahardaǵy 4 úi (340 páter) 2025 jylǵa ótpeli. Májiliste jaýapty merdiger mekeme basshylarynyń da esepteri tyńdalyp, olarǵa jumysty shiratý jóninde tapsyrma berildi.
