تۇركىستان وبلىسىندا تۇرعىنداردى ارەندالىق ۇيمەن قامتۋ جۇمىسى جالعاسۋدا. 2024 جىلدىڭ جوسپارى بويىنشا وبلىس كولەمىندە 2590 پاتەرلى ارەندالىق تۇرعىن ۇيلەردى ساتىپ الۋعا 47،5 ملرد. تەڭگە بولىنگەن. بولىنگەن قارجىعا وبلىس بويىنشا 191 مىڭ شارشى مەتردەن اساتىن 247 كوپقاباتتى تۇرعىن ءۇي ساتىپ الۋ كوزدەلگەن، دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
وبلىس اكىمى دارحان ساتىبالدىنىڭ توراعالىعىمەن وتكەن ماجىلىستە تۇرعىن ۇيلەردىڭ قۇرىلىس بارىسى پىسىقتالىپ، ماسەلەلەر تالقىلاندى. ءوڭىر باسشىسى جۇمىستى دۇرىس ۇيلەستىرە الماعان اۋدان، قالا اكىمدەرى مەن باسقارما باسشىلارىنا جانە مەردىگەرلەرگە سىن-ەسكەرتپە ايتىپ، جۇمىستى شيراتۋدى تاپسىردى.
– ۇيلەردىڭ قۇرىلىسى ساپالى ءارى ۋاقتىلى اياقتالۋى ءتيىس. مەن جۇمىستاردى قىسقا دەيىن ءبىتىرۋدى تاپسىرعانمىن. بيۋدجەت قارجىسىن ءتيىمدى يگەرىپ، ۇيلەردى جىل سوڭىنا دەيىن تولىق تاپسىرىڭىزدار. بۇل ۇيلەردى ەل كۇتىپ وتىر. تالاي تۇرعىن ءۇي كەزەگىندە تۇر. سوندىقتان جۇمىستى جاۋاپكەرشىلىكپەن اتقارىڭىزدار. ۇيلەردىڭ قاسبەتىن ءبىر ۇلگىدە جاساۋ ماسەلەسى نازاردان تۇسپەۋى ءتيىس. اباتتاندىرۋ جۇمىستارىن دا ساپالى ورىنداۋ قاجەت، – دەدى دارحان ساتىبالدى.
تۇركىستان وبلىستىق قۇرىلىس باسقارماسى باسشىسىنىڭ مىندەتىن اتقارۋشى اباي تۇرحانوۆتىڭ ايتۋىنشا، بۇگىنگى تاڭدا 935 پاتەر ساتىپ الىنعان (جەتىساي – 2، قازىعۇرت – 16، ماقتاارال – 43، ورداباسى – 12، سوزاق – 24، شاردارا – 24، كەنتاۋ – 30، تۇركىستان – 768، ساۋران – 16). جوسپارعا سايكەس قاراشا ايىندا 616 پاتەر، ال جەلتوقسان ايىندا 1039 پاتەر ساتىپ الىنادى دەپ كۇتىلىپ وتىر. بۇل نىسانداردىڭ قۇرىلىسى قاتاڭ باقىلاۋعا الىنعان.
قۇرىلىس جۇمىستارى 12 اۋداندا (882 پاتەر) قارقىندى جۇرگىزىلۋدە. نەگىزگى جۇمىستارى اياقتالىپ، ارلەۋ جۇمىستارى 80% اتقارىلعان. ال 3 اۋداندا 4 ءۇيدىڭ (88 پاتەر) قۇرىلىس قارقىنى تومەن. اتاپ ايتقاندا، بايدىبەك، سايرام جانە ساۋران اۋداندارىنداعى عيماراتتار كەستەدەن كەشىگىپ جاتىر. اتالعان اۋدانداردىڭ اكىمدەرىنە ءتيىستى سىن-ەسكەرتپە ايتىلىپ، جۇمىستى شيراتۋ تاپسىرىلدى. جۇمىسشىلار سانىڭ كوبەيتىپ، قۇرىلىستى ەكى اۋىسىمدا ۇيىمداستىرۋ مىندەتتەلدى.
تۇركىستان قالاسىندا 20 ءۇي، جالپى 1716 پاتەردىڭ قۇرىلىس جۇمىستارى اتقارىلۋدا. ونىڭ ىشىندە 16 ءۇيدى (1376 پاتەر) جىل سوڭىنا دەيىن ساتىپ الۋ جوسپارلانعان. شاھارداعى 4 ءۇي (340 پاتەر) 2025 جىلعا وتپەلى. ماجىلىستە جاۋاپتى مەردىگەر مەكەمە باسشىلارىنىڭ دا ەسەپتەرى تىڭدالىپ، ولارعا جۇمىستى شيراتۋ جونىندە تاپسىرما بەرىلدى.
