Túrkistan oblysynda «Taza Qazaqstan» baǵdarlamasy jalǵasyn taýyp keledi. Jyl sońyna deiingi bekitilgen kestege sáikes aýdan, qalalarda jalpy 624 aýqymdy senbilik ótkizildi. Bul týraly búgin oblys ákimi Darhan Satybaldynyń tóraǵalyǵymen ótken apparat májilisinde keńinen talqylandy. Óńir basshysy bul baǵyttaǵy jumystardy odan ári jandardyrýdy, júieleýdi jáne jiti qadaǵalaýdy tapsyrdy, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Jiyn barysynda oblys ákiminiń birinshi orynbasary Zulpyhar Joldasov baiandama jasap, oblys kóleminde senbilikter turaqty ótkizilip jatqanyn jetkizdi. Ótken aptanyń ishinde 14 aýdannyń 35 eldi mekeninde aýqymdy senbilik uiymdastyrylyp, 3 myńnan asa turǵyn qatysyp, 67 tehnika jumyldyrylǵan. Nátijesinde 40 tonnaǵa jýyq qoqys shyǵarylǵan. Aýdan men qalalarǵa kireberis aýmaqtary rettelip, tazalaý jumystary júrgizildi.
Respýblika kúnine orai, barlyq, aýdan, qala aýmaqtarynda aýqymdy senbilik uiymdastyryldy. Oǵan 30 myńnan asa turǵyn atsalysyp, 456 tehnika tartyldy. Senbilik barysynda 790 aǵash otyrǵyzylyp, 200-den asa aialdama retke keltirildi. Ishki jol boilary tazalanǵan.
Oblys ákiminiń tapsyrmasyna sáikes, «Taza Qazaqstan» baǵdarlamasyn uiymdastyrý boiynsha aýdan, qala ákimderiniń reitingi ázirlendi. Ákimderdiń jumysyn baǵalaý barysynda birneshe kriteriiler basshylyqqa alyndy. Nátijesinde Túrkistan qalasy jáne Báidibek, Maqtaaral, Jetisai, aýdandarynyń kórsetkishteri joǵary deńgeidi qurasa, Saryaǵash, Shardara, Túlkibas aýdandary jáne Arys, Kentaý qalalary orta deńgeidegi kórsetkishterge qol jetkizdi. Al qalǵan aýdandardyń kórsetkishteri tómen deńgeide. Ádistemeniń kómegimen aýdandar men qalalar ákimderiniń abattandyrý, kógaldandyrý, sanitarlyq tazalyq jumystarynyń obektivti baǵalaýǵa jáne óńirlerdiń damýyn yntalandyrýǵa múmkindik týady.
Telegramm bot platformasynda búgingi tańda 534 ótinim túsken. Onyń ishinde 517 ótinim oryndalyp, 16 ótinim maǵynasyz bolǵandyqtan qaitaryldy. Al 1 ótinim oryndalýda. Jyl basynan beri qoǵamdyq oryndarda zań talaptaryn buzǵan tulǵalarǵa 25 myńnan astam hattama toltyrylyp 288,5 mln. teńgege aiyppul salyndy.
Búginde abattandyrý qaǵidasyna sáikes irgeles jatqan aýmaqtyń tazalyǵy boiynsha 25 myńnan astam jeke turǵyn úi men 15 myńnan astam kásipkerlik obektisine monitoring júrgizildi. Nátijesinde myńnan asa eskertý jáne 625 aiyppul salyndy. Qaǵidanyń sapaly oryndaý baǵytyndaǵy jumystar kúndelikti júrgiziledi. Sondai-aq 120 kóppáterli turǵyn úidiń syrtqy kelbetterin retke keltirý boiynsha jumystar júrgizilýde. Nátijesinde 81 kóppáterli turǵyn úidiń syrtqy kelbeti retke keltirildi. Jyl sońyna deiin 39 kóppáterli turǵyn úidiń syrtqy qasbetteri retke keltirilmek.
Aita keteiik, búginde aýdan, qala ákimdikteri tarapynan eldi mekenderdi kógaldandyrý boiynsha aǵashtar otyrǵyzylatyn oryndar josparlanyp, daiyndyq jumystary júrgizilýde. Qarasha aiynan bastap aǵashtardy otyrǵyzý jumystary josparlanýda. Jalpy «Taza Qazaqstan» baǵdarlamasynyń ótýi turaqty qadaǵalanady.
