Búginde baǵbandar ozyq tehnologıanyń nátıjesinde 2,8 myń gektar jerge egilgen qarqyndy baýdyń ónimdiligi, dástúrli tásilmen egilgen 29 myń gektar baýdyń ónimdiligine qaraǵanda 1,5-2 esege artqanyna kóz jetkizdi. Bul keshegi Elbasy Joldaýynyń úshinshi baǵytynda aıtylǵan «Aqyldy tehnologıalar» – agroónerkásip keshenin qarqyndy damytý tapsyrmasyna saıady.
Al óńirdegi jylyjaılardyń 70 gektary avtomattandyrylǵan. Osynyń arqasynda 1 gektarǵa shaqqandaǵy ónimdilik 1 jylda 200 tonnadan astam qıar men 400 tonnaǵa jýyq qyzanaq beredi.
Budan bólek, mal sharýashylyǵynda barlyq mal basynyń esebi avtomattandyrylyp otyr. Bul shara, maldardyń qozǵalysyn jáne barlyq veterınarlyq is-sharalardy turaqty baqylaýǵa múmkindik beredi.
Sonymen qatar oblystaǵy mal sharýashylyǵy ónimin óndirý men óńdeýde jańa tehnologıalar belsendi túrde qoldanýda. Mysaly, sút óndirisin damytýmen aınalysatyn «Bórte-Mılka» sút taýarly fermasy sıyrdy saýýdan bastap azyqtandyrý jáne sútti saqtaýǵa deıingi prosesti avtomattandyrylǵan júıe arqyly atqarady. Óndiristi avtomattandyrý nátıjesinde kásiporynda 1 sıyrdan jylyna 7 myń lıtrge deıin sút alynady, al dástúrli tásilmen ónimdilik 3 myń lıtrdi quraıdy.
Sonymen birge oblystaǵy 2,7 mln. bas qusynyń 1,2 mıllıony zamanaýı avtomattandyrylǵan qus fermalarynda («Shymkent qus», «Ordabasy qus») ósiriledi. Onda taýyqtardy qorektendirý, jumyrtqa jınaý, soıý, daıyn ónimdi saqtaý men sanıtarlyq jumystardyń barlyǵy avtomattandyrylǵan júıe arqyly iske asyrylady. Sıfrlyq tehnologıany qoldanýdyń nátıjesinde qus etin óndirý 5 esege deıin artty.
Al eýropalyq standartarǵa sáıkes keletin «SPK Hamıt» 2,7 myń tonna óńdelgen balyq ónimderin shyǵarsa, «Aq sanat ınjenırıng» 1 myń tonna tiri balyq ósirdi. Bul kásiporyndardyń ónimderi Eýropa memleketterine eksporttalady. Jalpy aýyl sharýashylyq salasynyń ónimdiligin artyrý maqsatynda zamanaýı tehnologıalardy endirý jáne óndirý men óńdeý prosesterin avtomattandyrý jumystaryn iske asyrý jergilikti atqarýshy bıliktiń basty mindetteriniń biri bolyp otyr.
Túrkistan oblysy ákiminiń baspasóz qyzmeti
