Túrkistan oblysyna QR Senat tóraǵasy Máýlen Áshimbaev bastaǵan top jumys saparymen keldi. Senat spikeriniń tóraǵalyǵymen Ornyqty damý salasyndaǵy ulttyq maqsattar men mindetterdiń iske asyrylýyna monitoring júrgizý jónindegi parlamenttik komissiianyń besinshi otyrysy ótti. Is-shara barysynda sý resýrstaryn únemdi paidalaný jáne sanitariia máselelerine qatysty problemalar talqylandy.
Mańyzdy jiynda Túrkistan oblysynyń ákimi Darhan Satybaldy sý salasyn damytý baǵytyndaǵy jumystar, máseleler jáne aldaǵy josparlar jóninde baiandama jasady.
– Qurmetti Máýlen Saǵathanuly! Parlamenttik komissiia otyrysynyń Túrkistan oblysynda ótkizilip jatqany biz úshin óte mańyzdy. Memleket basshysy «Ishki sý qorymyz kóktemgi jáne qardyń sýyn jinap jáne ony egistikke tiimdi paidalaný» úshin 20 jańa bógen salý, keminde 15 sý qoimasyna kúrdeli jóndeý júrgizý jóninde tapsyrma bergen bolatyn. Búgingi tańda oblysta jalpy syiymdylyǵy 8,8 mlrd. tekshe metrdi quraityn 42 sý qoimasy bar. Jańa sý qoimalaryn salý jáne qoldanystaǵy sý qoimalaryn qalpyna keltirý jumystary atqarylýda.
«Boraldai», «Báidibek ata» sý qoimalaryn salý jobalary ázirlendi. Jobalar tolyq iske asqan jaǵdaida «Bógen» sý qoimasyna qosymsha 113 mln.m3 aǵyn sý jetkizilip, Túrkistan qalasy aýmaǵynda aǵyn sý máselesi sheshimin tabady. «Báidibek ata» sý qoimasyn salý jumystaryna 2023 jylǵa oblystyq biýdjetten 680 mln. teńge qaralyp, qurylys jumystary bastaldy. «Boraldai», «Bógen», «Qosqorǵan» sý qoimalarynyń tehnikalyq ekonomikalyq negizdemesi jáne jobalyq-smetalyq qujattamasy ázirlenýde. Túrkistan oblysynda barlyq kanaldardyń jalpy uzyndyǵy 12,3 myń shaqyrymdy quraidy. Uzyndyǵy 59 shaqyrymdy quraityn «Túrkistan magistraldy kanalyn kúrdeli jóndeý» jobasynyń 1-shi kezeńi aiaqtaldy. Nátijesinde, jylyna 60 mln. m3 aǵyn sý únemdelip otyr.
Endigi kezekte kanaldyń 2-shi kezeńiniń jobasy daiyn. Jobany aiasynda 25 dana sý ótkizý qurylymdary avtomattandyrylady, 24,9 shaqyrym kanaldy betondaý arqyly jylyna 29 mln. m3 aǵyn sý únemdeledi. Sonymen qatar birinshi kezekte jóndeýdi qajet etetin sý nysandaryna jobalyq-smetalyq qujattamalar ázirlenýde. Búgingi tańda jalpy quny 73,9 mlrd. teńgeni quraityn 17 joba daiyn. Tiisti qarjy bólinse, 236 shaqyrym kanal betonmen qaptalyp, 49,8 myń gektar jerdiń sýmen qamtamasyz etilýi jaqsarady. Oblystyq «Turan sý» kommýnaldyq kásipornynyń jumysy júielenip, 46 dana arnaiy tehnikalar satyp alyndy. Mekeme óz qarajaty esebinen 680 shaqyrym kanalǵa tazalaý jumystaryn júrgizdi, – dedi Darhan Satybaldy.
Oblysta sý únemdeý tehnologiialaryn shyǵaratyn kásiporyndar ashylýda. «BNK Group LTD» JShS-niń jylyna 1000 dana jańbyrlatyp sýǵarý mashinalaryn shyǵarý zaýyty iske qosyldy. «Turan sý» kásiporny janynan jyldyq qýattylyǵy 9 myń gektarǵa tamshylatyp sýǵarý júiesin shyǵaratyn kásiporyn iske qosylady. Sonymen birge óńir turǵyndaryn aýyz sýmen qamtý baǵytynda da júieli jumys atqarylýda.
Túrkistan oblysyna sapar aiasynda Máýlen Áshimbaev bastaǵan senatorlar jergilikti máslihat depýtattarymen jáne óńir jurtshylyǵymen de kezdesti. Óz sózinde Senat tóraǵasy Memleket basshysynyń Ulttyq quryltaida belgilep bergen bastamalaryna keńinen toqtalyp ótti. Sondai-aq oblys turǵyndarymen birge óńirdegi ózekti máselelerdi ońtaily sheshý joldaryn talqylady.
Oblys ákimi Darhan Satybaldy óńirdiń áleýmettik-ekonomikalyq damý kórsetkishterine toqtaldy. 2023 jyly óńirdiń negizgi ekonomikalyq kórsetkishteriniń oń ósimi saqtaldy. Jalpy óńirlik ónim kólemi 3,8 trln. teńgege jetip, ónerkásip ónim kólemi alǵash ret 1 trln. teńgeden asyp, 2,5%-ǵa ósti. Óńdeý ónerkásibin damytý maqsatynda josparlanǵan 20 joba tolyq iske qosyldy. Nátijesinde 30,2 mlrd. teńge investitsiia tartylyp, 594 jumys orny quryldy.
Aýyl sharýashylyǵynda ónim kólemi 1,2 trln. teńgeni qurap, respýblikada kósh bastady. Oblys ekonomikasyna 972 mlrd. teńge investitsiia tartylyp, kólemi artty. 2023 jylǵa josparlanǵan 56 investitsiialyq joba tolyǵymen iske qosylǵan. Qurylys jumystarynyń kólemi 407,5 mlrd. teńgeni qurap, +11,1%-ǵa ósti 2023 jyly 899 myń sharshy metr turǵyn úi paidalanýǵa berildi. Atqarylǵan jumystar nátijesinde 3 myńǵa jýyq otbasy jańa páterge ie boldy.
