Keles aýdanynda shegirtke ziiankesine qarsy kúres sharalary pysyqtalǵan kezekti shtab otyrysy ótti, dep habarlaidy Dalanews.kz
Májiliske QR AShM agroónerkásip keshenindegi memlekettik inspektsiia komiteti tóraǵasynyń mindetin ýaqytsha atqarýshy Saken Qanybekov, Túrkistan oblysy ákiminiń orynbasary Nurbol Turashbekov, Túrkistan oblysy Qorǵanys isteri departamenti bastyǵynyń orynbasary Jandos Kúlderbaev jáne jergilikti turǵyndar qatysty.
QR AShM agroónerkásip keshenindegi memlekettik inspektsiiasynyń Túrkistan oblystyq aýmaqtyq inspektsiianyń basshysy Nurbol Bekmuratov Marokko shegirtkesine qarsy himiialyq óńdeý jumystarynyń barysyn baiandap, aýdandarda anyqtalǵan oshaqtar jóninde málimdedi.
Shegirtke ziiankesine qarsy qazirgi tańda 67,3 myń gektar zerttelip, onyń 10,8 myń gektarynda dernásildiń ziiandy sheginen (EZSh) asqany anyqtaldy. 7,1 myń gektar óńdeldi. Anyqtalǵan oshaqtarda dárileý aspaly búrikkishpen júzege asyrylýda. Al alqaptardy dárileýge arnaiy tehnikalar jumyldyrylýda.
Arys qalasy boiynsha 131,6 myń gektardy óńdeý josparlanǵan, 22 sektorda 381 jumysshy himiialyq óńdeýge qatysýda. Anyqtaýshylar sany – 450. Esepti merzimde óńdelgen aýmaq 2764,9 gektardy quraidy.
Keles aýdanynda dárilenetin aimaqtyń jalpy kólemi 88,6 myń gektar, 17 sektorǵa bólingen. 136 azamat dárileýdi júzege asyrsa, 358 azamat oshaqtardy anyqtaýǵa kúsh salýda. Búginge deiin 2176,9 gektar jer himiialyq óńdeýden ótti.
Saryaǵash aýdanynda 81,3 myń gektar jer zalalsyzdandyrylady dep kózdelgen. 15 sektorda oshaqtardy anyqtaýǵa 390 adam tartylǵan. Naqty óńdelgen aýmaq 1832,4 gektardy quraidy. Jumys jalǵasýda.
Oblys ákiminiń orynbasary Nurbol Turashbekov merdigerdiń tehnikalarynan bólek ákimdik tarapynan demeýshiler uiymdastyrylyp, qosymsha tehnikalar tartylǵanyn atap ótti.
– Qazirgi sát – bárimiz úshin syn saǵaty. Merdigerdiń tehnikasy buzyldy dep, qol qýsyryp qarap otyrýǵa bolmaidy. Aýdan ákimdikteri men iri agroqurylymdardan 41 tehnika kómekke shyǵady. Oshaqtardy anyqtaý úshin qosymsha Arys – 10, Saryaǵash 2 dron qoldanady. Demeýshiler esebinen, 5 gazogenerator jáne 1 ushaq jalǵa alyndy, – dedi Nurbol Turashbekov.
Sondai-aq ýly himikattarmen tikelei jumys atqaratyn mamandardyń densaýlyǵyn kútý, ýlanýdyń aldyn alý maqsatynda meditsinalyq qaýipsizdik sharalaryn uiymdastyrý aýdan-qala ákimderiniń orynbasarlaryna júkteldi.
Saken Qanybekov ákimdiktiń atqarǵan jumystaryn oń baǵalap, agroónerkásip keshenindegi memlekettik inspektsiia komiteti tarapynan tiisti qoldaý men kómek kórsetiletinin jetkizdi.
