كەلەس اۋدانىندا شەگىرتكە زيانكەسىنە قارسى كۇرەس شارالارى پىسىقتالعان كەزەكتى شتاب وتىرىسى ءوتتى، دەپ حابارلايدى Dalanews.kz
ماجىلىسكە ق ر اشم اگروونەركاسىپ كەشەنىندەگى مەملەكەتتىك ينسپەكسيا كوميتەتى ءتوراعاسىنىڭ مىندەتىن ۋاقىتشا اتقارۋشى ساكەن قانىبەكوۆ، تۇركىستان وبلىسى اكىمىنىڭ ورىنباسارى نۇربول تۇراشبەكوۆ، تۇركىستان وبلىسى قورعانىس ىستەرى دەپارتامەنتى باستىعىنىڭ ورىنباسارى جاندوس كۇلدەربايەۆ جانە جەرگىلىكتى تۇرعىندار قاتىستى.
ق ر اشم اگروونەركاسىپ كەشەنىندەگى مەملەكەتتىك ينسپەكسياسىنىڭ تۇركىستان وبلىستىق اۋماقتىق ينسپەكسيانىڭ باسشىسى نۇربول بەكمۇراتوۆ ماروككو شەگىرتكەسىنە قارسى حيميالىق وڭدەۋ جۇمىستارىنىڭ بارىسىن بايانداپ، اۋدانداردا انىقتالعان وشاقتار جونىندە مالىمدەدى.
شەگىرتكە زيانكەسىنە قارسى قازىرگى تاڭدا 67،3 مىڭ گەكتار زەرتتەلىپ، ونىڭ 10،8 مىڭ گەكتارىندا دەرناسىلدىڭ زياندى شەگىنەن (ەزش) اسقانى انىقتالدى. 7،1 مىڭ گەكتار وڭدەلدى. انىقتالعان وشاقتاردا دارىلەۋ اسپالى بۇرىككىشپەن جۇزەگە اسىرىلۋدا. ال القاپتاردى دارىلەۋگە ارنايى تەحنيكالار جۇمىلدىرىلۋدا.
ارىس قالاسى بويىنشا 131،6 مىڭ گەكتاردى وڭدەۋ جوسپارلانعان، 22 سەكتوردا 381 جۇمىسشى حيميالىق وڭدەۋگە قاتىسۋدا. انىقتاۋشىلار سانى – 450. ەسەپتى مەرزىمدە وڭدەلگەن اۋماق 2764،9 گەكتاردى قۇرايدى.
كەلەس اۋدانىندا دارىلەنەتىن ايماقتىڭ جالپى كولەمى 88،6 مىڭ گەكتار، 17 سەكتورعا بولىنگەن. 136 ازامات دارىلەۋدى جۇزەگە اسىرسا، 358 ازامات وشاقتاردى انىقتاۋعا كۇش سالۋدا. بۇگىنگە دەيىن 2176،9 گەكتار جەر حيميالىق وڭدەۋدەن ءوتتى.
سارىاعاش اۋدانىندا 81،3 مىڭ گەكتار جەر زالالسىزداندىرىلادى دەپ كوزدەلگەن. 15 سەكتوردا وشاقتاردى انىقتاۋعا 390 ادام تارتىلعان. ناقتى وڭدەلگەن اۋماق 1832،4 گەكتاردى قۇرايدى. جۇمىس جالعاسۋدا.
وبلىس اكىمىنىڭ ورىنباسارى نۇربول تۇراشبەكوۆ مەردىگەردىڭ تەحنيكالارىنان بولەك اكىمدىك تاراپىنان دەمەۋشىلەر ۇيىمداستىرىلىپ، قوسىمشا تەحنيكالار تارتىلعانىن اتاپ ءوتتى.
– قازىرگى ءسات – ءبارىمىز ءۇشىن سىن ساعاتى. مەردىگەردىڭ تەحنيكاسى بۇزىلدى دەپ، قول قۋسىرىپ قاراپ وتىرۋعا بولمايدى. اۋدان اكىمدىكتەرى مەن ءىرى اگروقۇرىلىمداردان 41 تەحنيكا كومەككە شىعادى. وشاقتاردى انىقتاۋ ءۇشىن قوسىمشا ارىس – 10، سارىاعاش 2 درون قولدانادى. دەمەۋشىلەر ەسەبىنەن، 5 گازوگەنەراتور جانە 1 ۇشاق جالعا الىندى، – دەدى نۇربول تۇراشبەكوۆ.
سونداي-اق ۋلى حيميكاتتارمەن تىكەلەي جۇمىس اتقاراتىن مامانداردىڭ دەنساۋلىعىن كۇتۋ، ۋلانۋدىڭ الدىن الۋ ماقساتىندا مەديسينالىق قاۋىپسىزدىك شارالارىن ۇيىمداستىرۋ اۋدان-قالا اكىمدەرىنىڭ ورىنباسارلارىنا جۇكتەلدى.
ساكەن قانىبەكوۆ اكىمدىكتىڭ اتقارعان جۇمىستارىن وڭ باعالاپ، اگروونەركاسىپ كەشەنىندەگى مەملەكەتتىك ينسپەكسيا كوميتەتى تاراپىنان ءتيىستى قولداۋ مەن كومەك كورسەتىلەتىنىن جەتكىزدى.
