Túrkistan oblysynda qarýdy qabyldap alý aksıasy bastaldy. Bul jaıynda brıfıńte Túrkistan oblysy PD Ákimshilik polısıa basqaramasynyń ınspektory Abdýlla Amanbaev málimdedi, - dep habarlaıdy Dalanews.kz
Spıkerdiń sózinshe, bıyl 21 sáýirden bastap Respýblıka kóleminde zańsyz saqtaýda turǵan atys qarýyn, oq-dáriler men jarylǵysh zattardy satyp alý aksıa ótedi. İs-shara QR İİM-niń nusqaýyna sáıkes, qoǵamdyq qaýipsizdikti qamtamasyz etý, atys qarýy men jarylǵysh zattardy qoldana otyryp jasalatyn qylmystar men quqyq buzýshylyqtardyń aldyn alýǵa baǵyttalǵan.
«Zańsyz saqtaýdaǵy qarý-jaraq quraldaryn satyp alý jónindegi aksıa QR İshki ister mınıstriniń 2015 jylǵy 27 naýryzdaǵy buıryǵymen bekitilgen. Erikti túrde tapsyrylatyn atys qarýyna, oq-dáriler men jarylǵysh zattarǵa dárejesine qaraı aqshalaı syıaqy beriledi. Iaǵnı, avtomatty oıyq qarýǵa - 393 200 teńgege deıin, uzyn oıyq uńǵyly qarýǵa - 196 600 teńgege deıin, qysqa uńǵyly oıyq qarýǵa - 157 280 teńgege deıin, tegis uzyn uńǵyly qarýǵa - 117 960 teńgege deıin beriledi.
Odan bólek, travmatıkalyq tapansha nemese revolverge - 39 320 teńgege deıin, jarylǵysh zat jáne arterıalyq snarádqa - 27 524 teńgege deıin, jarylǵysh zattyń 1000 gramyna - 23 592 teńgege deıin beriledi. Odan bólek, 5,6 mm kalıbrden joǵary oıyq uńǵyly qarýdan atýǵa arnalǵan oqtyń danasyna - 112 teńgeden, 5,6 mm kalıbrli kishi oıyq uńǵyly qarýdan atýǵa arnalǵan oqtarǵa danasyna - 34 teńgeden beriledi. Zańsyz saqtalǵan atys qarýyn, oq-dárilerdi jáne jarylǵysh zattardy erikti túrde tapsyrylǵan azamattar qylmystyq jáne ákimshilik jaýapkershilikten bosatylady», - dedi Abdýlla Amanbaev.
