Túrkistan oblysy, Ordabasy aýdanyndaǵy Temirlan eldi mekeninde Qajymuqan Muńaitpasuly atyndaǵy mádeni-sport kesheni el igiligine paidalanýǵa berildi. Nysannyń ashylý saltanatyna oblys ákimi Nuralhan Kósherov, Qajymuqan Muńaitpasulynyń urpaǵy jáne aýdan turǵyndary qatysty,- dep habarlaidy Dalanews.kz
Oblys basshysy turǵyndardyń qýanyshyn bólisip, kópshilikti mańyzdy nysannyń ashylýymen quttyqtady.
– Búgin biz kieli Ordabasy aýdanyndaǵy zamanaýi sport kesheniniń ashylý saltanatyna jinalyp otyrmyz. Salaýatty ómir saltyn nasihattaý, mádeniet pen týrizmdi damytý jáne turǵyndardyń sportpen ainalysýyna jaǵdai jasaý — Memleket basshysy basa nazar aýdarǵan ulttyq basymdyqtardyń biri. Bul baǵytta óńirimizde aýqymdy jumystar atqarylyp keledi. Búgingi mádeni-sport kesheniniń ashylýy —óńirimizde sport pen mádenietti, sonymen qatar týrizmdi damytýǵa jasalǵan mańyzdy qadam. Qazaq batyry Qajymuqan Muńaitpasovtyń esimi berilgen bul keshen tek sport pen mádeniettiń orny ǵana emes, sonymen qatar babamyzǵa degen qurmettiń belgisi. Balýan babamyz ómiriniń sońǵy kezderin osy mekende ótkizgen. Onyń kesenesi de osy aýmaqta ornalasqan. Bul igi bastama babamyzdyń sporttaǵy uly jetistigin urpaqqa úlgi etýge baǵyttalǵan. Eń aldymen osyndai aýqymdy keshenniń qurylysyna bastamashy bolǵan azamattarǵa alǵysymdy bildiremin. Sport kesheni el igiligine nátijeli qyzmet etip, osy keshennen eldiń abyroiyn asqaqtatar jańa chempiondar shyǵady dep senemin! – dedi Nuralhan Oralbaiuly.
Túrkistan oblysynyń ákimi Qajymuqan Muńaitpasovtyń urpaǵymen kezdesip, pikirlesti. Qurmet kitabyna izgi tilegin jazyp, qoltańbasyn qaldyrdy.
Nysan qurylysyn «Ordabasy aýdandyq qurylys, sáýlet jáne qala qurylysy bólimi» MM tapsyrysymen «Avtoremstroi LTD» JShS júrgizdi. 5 gektar aýmaqta ornalasqan ǵimarattyń jalpy aýdany – 3 622 sharshy metr. Joba quny – 1,3 mlrd. teńge.
Mádeni-sport kesheni 3 ǵimarattan turady. Munda murajai, kitaphana, kórme zaly, ashana, konferentsiia zaly, sport ortalyǵy, sportshylar kiim aýystyratyn jáne basqa da qajetti bólmeler qarastyrylǵan. 148 oryndyq amfiteatr stilinde salynǵan keshende aýyldyq, aýdandyq, oblystyq jáne respýblikalyq deńgeilerde kúrestiń kásipqoi jáne olimpiadalyq túrleri: erkin kúres, dziýdo, qazaqsha kúres, sambo kúresinen jarystar ótkizýge múmkindik bar.
Halyqaralyq avtojol boiynda salynǵan zamanaýi keshende týrister úshin de barlyq jaǵdai qarastyrylǵan. Ǵimarat ishindegi 138 oryndyq konferentsiia zaly, 48 oryndyq ashana men 126 adamǵa laiyqtalǵan shaǵyn kórme zaly, kitaphana týrister úshin táýlik boiy qyzmet kórsetedi.
Aita keteiik, búgingi tańda Ordabasy aýdanynda sportpen turaqty túrde aýdan halqynyń 42 paiyzy, iaǵni 53748 adam shuǵyldanady. Al, aýdanda sporttyq infraqurylymmen qamtamasyz etý deńgeii 47 paiyzdy quraidy.
