تۇركىستان وبلىسى، ورداباسى اۋدانىنداعى تەمىرلان ەلدى مەكەنىندە قاجىمۇقان مۇڭايتپاس ۇلى اتىنداعى مادەني-سپورت كەشەنى ەل يگىلىگىنە پايدالانۋعا بەرىلدى. نىساننىڭ اشىلۋ سالتاناتىنا وبلىس اكىمى نۇرالحان كوشەروۆ، قاجىمۇقان مۇڭايتپاس ۇلىنىڭ ۇرپاعى جانە اۋدان تۇرعىندارى قاتىستى،- دەپ حابارلايدى Dalanews.kz
وبلىس باسشىسى تۇرعىنداردىڭ قۋانىشىن ءبولىسىپ، كوپشىلىكتى ماڭىزدى نىساننىڭ اشىلۋىمەن قۇتتىقتادى.
– بۇگىن ءبىز كيەلى ورداباسى اۋدانىنداعى زاماناۋي سپورت كەشەنىنىڭ اشىلۋ سالتاناتىنا جينالىپ وتىرمىز. سالاۋاتتى ءومىر سالتىن ناسيحاتتاۋ، مادەنيەت پەن ءتۋريزمدى دامىتۋ جانە تۇرعىنداردىڭ سپورتپەن اينالىسۋىنا جاعداي جاساۋ — مەملەكەت باسشىسى باسا نازار اۋدارعان ۇلتتىق باسىمدىقتاردىڭ ءبىرى. بۇل باعىتتا وڭىرىمىزدە اۋقىمدى جۇمىستار اتقارىلىپ كەلەدى. بۇگىنگى مادەني-سپورت كەشەنىنىڭ اشىلۋى —وڭىرىمىزدە سپورت پەن مادەنيەتتى، سونىمەن قاتار ءتۋريزمدى دامىتۋعا جاسالعان ماڭىزدى قادام. قازاق باتىرى قاجىمۇقان مۇڭايتپاسوۆتىڭ ەسىمى بەرىلگەن بۇل كەشەن تەك سپورت پەن مادەنيەتتىڭ ورنى عانا ەمەس، سونىمەن قاتار بابامىزعا دەگەن قۇرمەتتىڭ بەلگىسى. بالۋان بابامىز ءومىرىنىڭ سوڭعى كەزدەرىن وسى مەكەندە وتكىزگەن. ونىڭ كەسەنەسى دە وسى اۋماقتا ورنالاسقان. بۇل يگى باستاما بابامىزدىڭ سپورتتاعى ۇلى جەتىستىگىن ۇرپاققا ۇلگى ەتۋگە باعىتتالعان. ەڭ الدىمەن وسىنداي اۋقىمدى كەشەننىڭ قۇرىلىسىنا باستاماشى بولعان ازاماتتارعا العىسىمدى بىلدىرەمىن. سپورت كەشەنى ەل يگىلىگىنە ناتيجەلى قىزمەت ەتىپ، وسى كەشەننەن ەلدىڭ ابىرويىن اسقاقتاتار جاڭا چەمپيوندار شىعادى دەپ سەنەمىن! – دەدى نۇرالحان ورالباي ۇلى.
تۇركىستان وبلىسىنىڭ اكىمى قاجىمۇقان مۇڭايتپاسوۆتىڭ ۇرپاعىمەن كەزدەسىپ، پىكىرلەستى. قۇرمەت كىتابىنا ىزگى تىلەگىن جازىپ، قولتاڭباسىن قالدىردى.
نىسان قۇرىلىسىن «ورداباسى اۋداندىق قۇرىلىس، ساۋلەت جانە قالا قۇرىلىسى ءبولىمى» مم تاپسىرىسىمەن «اۆتورەمستروي لتد» ج ش س جۇرگىزدى. 5 گەكتار اۋماقتا ورنالاسقان عيماراتتىڭ جالپى اۋدانى – 3 622 شارشى مەتر. جوبا قۇنى – 1،3 ملرد. تەڭگە.
مادەني-سپورت كەشەنى 3 عيماراتتان تۇرادى. مۇندا مۇراجاي، كىتاپحانا، كورمە زالى، اسحانا، كونفەرەنسيا زالى، سپورت ورتالىعى، سپورتشىلار كيىم اۋىستىراتىن جانە باسقا دا قاجەتتى بولمەلەر قاراستىرىلعان. 148 ورىندىق امفيتەاتر ستيلىندە سالىنعان كەشەندە اۋىلدىق، اۋداندىق، وبلىستىق جانە رەسپۋبليكالىق دەڭگەيلەردە كۇرەستىڭ كاسىپقوي جانە وليمپيادالىق تۇرلەرى: ەركىن كۇرەس، دزيۋدو، قازاقشا كۇرەس، سامبو كۇرەسىنەن جارىستار وتكىزۋگە مۇمكىندىك بار.
حالىقارالىق اۆتوجول بويىندا سالىنعان زاماناۋي كەشەندە تۋريستەر ءۇشىن دە بارلىق جاعداي قاراستىرىلعان. عيمارات ىشىندەگى 138 ورىندىق كونفەرەنسيا زالى، 48 ورىندىق اسحانا مەن 126 ادامعا لايىقتالعان شاعىن كورمە زالى، كىتاپحانا تۋريستەر ءۇشىن تاۋلىك بويى قىزمەت كورسەتەدى.
ايتا كەتەيىك، بۇگىنگى تاڭدا ورداباسى اۋدانىندا سپورتپەن تۇراقتى تۇردە اۋدان حالقىنىڭ 42 پايىزى، ياعني 53748 ادام شۇعىلدانادى. ال، اۋداندا سپورتتىق ينفراقۇرىلىممەن قامتاماسىز ەتۋ دەڭگەيى 47 پايىزدى قۇرايدى.
