Túrkistan oblysynda eńbek qatynastary salasynda 2025 jyldyń qańtar-maýsym ailarynda 834 azamattan aryz-shaǵym túsip, sonyń negizinde 174 tekserý júrgizilgen. Nátijesinde 403 zań buzýshylyq anyqtalyp, 173 nusqama berilgen. Bul týraly Memlekettik eńbek inspektsiiasy komitetiniń Túrkistan oblysy boiynsha departament basshysy Amangeldi Álish málimdedi.
– Biylǵy jyldyń 6 aiynda oblysta 20 óndiristik jazataiym oqiǵa oryn alyp, saldarynan 23 adam zardap shekti. Ókinishke orai 3 adam jumys ornynda qaitys boldy. Ótken jyldyń osy kezeńimen salystyrǵanda óndiristegi jazataiym oqiǵalar sany 13 paiyzǵa azaiyp otyr.
Budan bólek, biyl jyl basynan 6 kásiporynda 4890 jumysker aldynda 454,7 mln teńge jalaqy qaryzy anyqtalyp, tolyqtai óndirildi. Sondai-aq, oblysta shetel jumys kúshin tartýǵa ruqsat berý komissiiasynda 34 kásiporynǵa 897 jumysshyǵa ruqsat berildi. Onyń 738-i maýsymdyq jumysshylarǵa, iaǵni maqta sharýashylyǵyna berilgen.
Óńirdegi investitsiialyq jobalardyń iske asý nátijesinde 19 319 jańa jumys ornyn ashý josparlanǵan. Bul baǵyttaǵy jumystar departamenttiń qatań baqylaýyna alynǵan, – dedi sala basshysy.
