تۇركىستان وبلىسىندا ەڭبەك قاتىناستارى سالاسىندا 2025 جىلدىڭ قاڭتار-ماۋسىم ايلارىندا 834 ازاماتتان ارىز-شاعىم ءتۇسىپ، سونىڭ نەگىزىندە 174 تەكسەرۋ جۇرگىزىلگەن. ناتيجەسىندە 403 زاڭ بۇزۋشىلىق انىقتالىپ، 173 نۇسقاما بەرىلگەن. بۇل تۋرالى مەملەكەتتىك ەڭبەك ينسپەكسياسى كوميتەتىنىڭ تۇركىستان وبلىسى بويىنشا دەپارتامەنت باسشىسى امانگەلدى ءالىش مالىمدەدى.
– بيىلعى جىلدىڭ 6 ايىندا وبلىستا 20 وندىرىستىك جازاتايىم وقيعا ورىن الىپ، سالدارىنان 23 ادام زارداپ شەكتى. وكىنىشكە وراي 3 ادام جۇمىس ورنىندا قايتىس بولدى. وتكەن جىلدىڭ وسى كەزەڭىمەن سالىستىرعاندا وندىرىستەگى جازاتايىم وقيعالار سانى 13 پايىزعا ازايىپ وتىر.
بۇدان بولەك، بيىل جىل باسىنان 6 كاسىپورىندا 4890 جۇمىسكەر الدىندا 454،7 ملن تەڭگە جالاقى قارىزى انىقتالىپ، تولىقتاي ءوندىرىلدى. سونداي-اق، وبلىستا شەتەل جۇمىس كۇشىن تارتۋعا رۇقسات بەرۋ كوميسسياسىندا 34 كاسىپورىنعا 897 جۇمىسشىعا رۇقسات بەرىلدى. ونىڭ 738ء-ى ماۋسىمدىق جۇمىسشىلارعا، ياعني ماقتا شارۋاشىلىعىنا بەرىلگەن.
وڭىردەگى ينۆەستيسيالىق جوبالاردىڭ ىسكە اسۋ ناتيجەسىندە 19 319 جاڭا جۇمىس ورنىن اشۋ جوسپارلانعان. بۇل باعىتتاعى جۇمىستار دەپارتامەنتتىڭ قاتاڭ باقىلاۋىنا الىنعان، – دەدى سالا باسشىسى.
