Túrkistan oblysynda biyl Naýryz meiramyn 10 kún boiy atap ótý josparlanyp otyr,- dep habarlaidy Dalanews.kz
14-23 naýryz kúnderi arylyǵynda «Kórisý kúni – amal merekesi», «Qaiyrymdylyq» syndy ataýly kúnderi túrli sharalar ótedi. Bul týraly Túrkistan oblysy mádeniet basqarmasynyń basshysy Ázimhan Qoilybaev brifingte málimdedi.
«14 naýryz - «Kórisý kúni – amal merekesi» kúni Ordabasy aýdany, Temirlan aýylyndaǵy «Shámshi» alleiasynda Túrkistan oblysy men Shymkent qalasynyń kórisý rásimi ótedi. Atalǵan sharada qos óńirdiń ziialy qaýym ókilderi, ardagerler, etnos ókilderi men ónerpazdary kezdesip, kórisý kúni oryndalatyn barlyq rásimderdi birlese atqaratyn bolady. Sondai-aq, osy kúni «Naýryz – jaqsylyqtyń jarshysy» ataýymen oblystyq chellenj uiymdastyrylady. Al, 15 naýryz –«Qaiyrymdylyq» kúni retinde atalyp ótpek. Bul kúni aýdan-qalalarda, aýyldarda jaǵdaiy tómen otbasylarǵa, múmkindigi shekteýli azamattarǵa kómek kórsetý maqsatynda qaiyrymdylyq aktsiiasy ótedi. Sondai-aq, «Meiirim – júrekten, qaiyrym – bilekten» oblystyq sharasy aiasynda qoǵamnyń osal toptaryna, soǵys, eńbek ardagerlerine, batyr analarǵa arnaiy syilyqtar tapsyrylady» - dedi basqarma basshysy.
Sonymen qatar, 16 naýryz kúni «Shańyraq» ataýymen atalyp, barlyq mektepterde, mektepten tys mekemelerde kontserttik baǵdarlamalar, sándik-qoldanbaly kórmeler, jaǵdaiy tómen otbasylardyń balalaryna, múmkindigi shekteýli balalarǵa kómek kórsetý sharalary uiymdastyrylmaq. Al, 17 naýryz – «Mádeniet jáne ulttyq salt-dástúr kúni» degen ataýmen barlyq mádeniet mekemelerinde ulttyq salt-dástúrlerdi jańǵyrtatyn sahnalyq kórinister uiymdastyrylady. 18 naýryz - «Ulttyq kiim kúni» retinde saǵat 09:00-den bastap Túrkistan oblysynyń memlekettik qyzmetshileri ulttyq kiim kiiý chellenjin bastaidy. Sonymen qatar, 19 naýryz «Jańarý kúni» dep atalmaq. Bul kúni barlyq óńirlerde tal kóshetterin egý jumystary uiymdastyrylady.
20 naýryz - «Ulttyq sport» kúninde barlyq óńirlerdegi sport keshenderi men atshabarlarda ulttyq sport túrlerinen jarystar ótedi. Al, 21 naýryz «Qosh keldiń – Áz Naýryz!» degen ataýmen Túrkistan qalasyndaǵy «Kerýen» saraiy aýmaǵynda oblys ákiminiń qatysýymen merekelik saltanatty is-shara josparlanyp otyr. Sondai-aq, osy kúni qazaq estrada juldyzdarynyń qatysýymen «Án men ánshi Túrkistan tórinde» kontserttik baǵdarlamasymen qorytyndylanatyn bolady. 22 naýryz «Jyl basy» kúni Túrkistan qalasy men barlyq aýdan-qalalardaǵy ortalyq alańdar men saiabaqtarda kórmeler, kontserttik baǵdarlamalar, ulttyq sporttyq oiyndar mereke kórkin qyzdyrady. Sondai-aq, «Kongress holl» kesheninde Respýblikalyq aqyndar aitysy, Túrkistan mýzykalyq drama teatrynda 2 kún boiy «Vals koroli» qoiylymy kórermen nazaryna usynylmaq.
Al 23 naýryz «Tazarý» kúni – oblys kóleminde jalpyhalyqtyq senbilik uiymdastyrylyp, aýdandar men qalalarda tazalyq jumystary júrgizilmek.
