تۇركىستان وبلىسىندا بيىل ناۋرىز مەيرامىن 10 كۇن بويى اتاپ ءوتۋ جوسپارلانىپ وتىر،- دەپ حابارلايدى Dalanews.kz
14-23 ناۋرىز كۇندەرى ارىلىعىندا «كورىسۋ كۇنى – امال مەرەكەسى»، «قايىرىمدىلىق» سىندى اتاۋلى كۇندەرى ءتۇرلى شارالار وتەدى. بۇل تۋرالى تۇركىستان وبلىسى مادەنيەت باسقارماسىنىڭ باسشىسى ءازىمحان قويلىبايەۆ بريفينگتە مالىمدەدى.
«14 ناۋرىز - «كورىسۋ كۇنى – امال مەرەكەسى» كۇنى ورداباسى اۋدانى، تەمىرلان اۋىلىنداعى «ءشامشى» اللەياسىندا تۇركىستان وبلىسى مەن شىمكەنت قالاسىنىڭ كورىسۋ ءراسىمى وتەدى. اتالعان شارادا قوس ءوڭىردىڭ زيالى قاۋىم وكىلدەرى، ارداگەرلەر، ەتنوس وكىلدەرى مەن ونەرپازدارى كەزدەسىپ، كورىسۋ كۇنى ورىندالاتىن بارلىق راسىمدەردى بىرلەسە اتقاراتىن بولادى. سونداي-اق، وسى كۇنى «ناۋرىز – جاقسىلىقتىڭ جارشىسى» اتاۋىمەن وبلىستىق چەللەنج ۇيىمداستىرىلادى. ال، 15 ناۋرىز –«قايىرىمدىلىق» كۇنى رەتىندە اتالىپ وتپەك. بۇل كۇنى اۋدان-قالالاردا، اۋىلداردا جاعدايى تومەن وتباسىلارعا، مۇمكىندىگى شەكتەۋلى ازاماتتارعا كومەك كورسەتۋ ماقساتىندا قايىرىمدىلىق اكسياسى وتەدى. سونداي-اق، «مەيىرىم – جۇرەكتەن، قايىرىم – بىلەكتەن» وبلىستىق شاراسى اياسىندا قوعامنىڭ وسال توپتارىنا، سوعىس، ەڭبەك ارداگەرلەرىنە، باتىر انالارعا ارنايى سىيلىقتار تاپسىرىلادى» - دەدى باسقارما باسشىسى.
سونىمەن قاتار، 16 ناۋرىز كۇنى «شاڭىراق» اتاۋىمەن اتالىپ، بارلىق مەكتەپتەردە، مەكتەپتەن تىس مەكەمەلەردە كونسەرتتىك باعدارلامالار، ساندىك-قولدانبالى كورمەلەر، جاعدايى تومەن وتباسىلاردىڭ بالالارىنا، مۇمكىندىگى شەكتەۋلى بالالارعا كومەك كورسەتۋ شارالارى ۇيىمداستىرىلماق. ال، 17 ناۋرىز – «مادەنيەت جانە ۇلتتىق ءسالت-داستۇر كۇنى» دەگەن اتاۋمەن بارلىق مادەنيەت مەكەمەلەرىندە ۇلتتىق سالت-داستۇرلەردى جاڭعىرتاتىن ساحنالىق كورىنىستەر ۇيىمداستىرىلادى. 18 ناۋرىز - «ۇلتتىق كيىم كۇنى» رەتىندە ساعات 09:00-دەن باستاپ تۇركىستان وبلىسىنىڭ مەملەكەتتىك قىزمەتشىلەرى ۇلتتىق كيىم كيۋ چەللەنجىن باستايدى. سونىمەن قاتار، 19 ناۋرىز «جاڭارۋ كۇنى» دەپ اتالماق. بۇل كۇنى بارلىق وڭىرلەردە تال كوشەتتەرىن ەگۋ جۇمىستارى ۇيىمداستىرىلادى.
20 ناۋرىز - «ۇلتتىق سپورت» كۇنىندە بارلىق وڭىرلەردەگى سپورت كەشەندەرى مەن اتشابارلاردا ۇلتتىق سپورت تۇرلەرىنەن جارىستار وتەدى. ال، 21 ناۋرىز «قوش كەلدىڭ – ءاز ناۋرىز!» دەگەن اتاۋمەن تۇركىستان قالاسىنداعى «كەرۋەن» سارايى اۋماعىندا وبلىس اكىمىنىڭ قاتىسۋىمەن مەرەكەلىك سالتاناتتى ءىس-شارا جوسپارلانىپ وتىر. سونداي-اق، وسى كۇنى قازاق ەسترادا جۇلدىزدارىنىڭ قاتىسۋىمەن «ءان مەن ءانشى تۇركىستان تورىندە» كونسەرتتىك باعدارلاماسىمەن قورىتىندىلاناتىن بولادى. 22 ناۋرىز «جىل باسى» كۇنى تۇركىستان قالاسى مەن بارلىق اۋدان-قالالارداعى ورتالىق الاڭدار مەن ساياباقتاردا كورمەلەر، كونسەرتتىك باعدارلامالار، ۇلتتىق سپورتتىق ويىندار مەرەكە كوركىن قىزدىرادى. سونداي-اق، «كونگرەسس حولل» كەشەنىندە رەسپۋبليكالىق اقىندار ايتىسى، تۇركىستان مۋزىكالىق دراما تەاترىندا 2 كۇن بويى «ۆالس كورولى» قويىلىمى كورەرمەن نازارىنا ۇسىنىلماق.
ال 23 ناۋرىز «تازارۋ» كۇنى – وبلىس كولەمىندە جالپىحالىقتىق سەنبىلىك ۇيىمداستىرىلىپ، اۋداندار مەن قالالاردا تازالىق جۇمىستارى جۇرگىزىلمەك.
