Memlekettik satyp alý portalynda Túrkistan oblysynda memlekettik rámizderdi paidalaný tártibine arnalǵan seminarlar ótkizý úshin 5 219 827 teńgege lot jariialanǵan, dep habarlaidy Dalanews.kz.
Tapsyrys berýshi - Túrkistan oblysynyń qoǵamdyq damý basqarmasy.
Portalda jariialanǵan málimetke sáikes, satyp alý memlekettik áleýmettik tapsyrys aiasynda júzege asyrylmaq. Lot bir qyzmet retinde rásimdelgen jáne 2026 jylǵa josparlanǵan.
Satyp alý sipattamasynda Qazaqstan Respýblikasynyń Memlekettik Týy, Eltańbasy jáne Ánuranyn paidalaný (ornatý, ornalastyrý) qaǵidalaryn túsindirýge baǵyttalǵan seminarlar ótkizý kózdelgen. Iaǵni, joba memlekettik rámizderdi óndirý nemese satyp alýǵa emes, olardy paidalaný tártibin oqytýǵa baǵyttalǵan.
Osyǵan bailanysty keibir qoǵam belsendileri biýdjet qarajatynyń maqsatty jumsalýyna kúmán keltirip otyr. Olar memlekettik rámizderdi paidalaný qaǵidalary zańda naqty bekitilgen jaǵdaida, ony bólek seminar arqyly túsindirýge qomaqty qarjy bólý orynsyz ekenin aityp jatyr.
Aita ketý kerek, Túrkistan oblysy respýblikalyq biýdjetten sýbventsiia alatyn óńirlerdiń qataryna jatady. Osyǵan bailanysty qoǵamda biýdjet qarajatynyń maqsatty ári tiimdi jumsalýyna qatysty saýaldar kóterilýde.
Qazirgi ýaqytta lot jariialanǵan, talqylaý jáne ótinim qabyldaý kezeńderi belgilengen. Al bul bastamanyń qanshalyqty tiimdi ári negizdi ekeni konkýrs nátijeleri men kórsetiletin qyzmettiń naqty mazmuny aiqyndalǵannan keiin belgili bolmaq.
