مەملەكەتتىك ساتىپ الۋ پورتالىندا تۇركىستان وبلىسىندا مەملەكەتتىك رامىزدەردى پايدالانۋ تارتىبىنە ارنالعان سەمينارلار وتكىزۋ ءۇشىن 5 219 827 تەڭگەگە لوت جاريالانعان، دەپ حابارلايدى Dalanews.kz.

تاپسىرىس بەرۋشى - تۇركىستان وبلىسىنىڭ قوعامدىق دامۋ باسقارماسى.

پورتالدا جاريالانعان مالىمەتكە سايكەس، ساتىپ الۋ مەملەكەتتىك الەۋمەتتىك تاپسىرىس اياسىندا جۇزەگە اسىرىلماق. لوت ءبىر قىزمەت رەتىندە راسىمدەلگەن جانە 2026 جىلعا جوسپارلانعان.

ساتىپ الۋ سيپاتتاماسىندا قازاقستان رەسپۋبليكاسىنىڭ مەملەكەتتىك تۋى، ەلتاڭباسى جانە ءانۇرانىن پايدالانۋ (ورناتۋ، ورنالاستىرۋ) قاعيدالارىن تۇسىندىرۋگە باعىتتالعان سەمينارلار وتكىزۋ كوزدەلگەن. ياعني، جوبا مەملەكەتتىك رامىزدەردى ءوندىرۋ نەمەسە ساتىپ الۋعا ەمەس، ولاردى پايدالانۋ ءتارتىبىن وقىتۋعا باعىتتالعان.

وسىعان بايلانىستى كەيبىر قوعام بەلسەندىلەرى بيۋدجەت قاراجاتىنىڭ ماقساتتى جۇمسالۋىنا كۇمان كەلتىرىپ وتىر. ولار مەملەكەتتىك رامىزدەردى پايدالانۋ قاعيدالارى زاڭدا ناقتى بەكىتىلگەن جاعدايدا، ونى بولەك سەمينار ارقىلى تۇسىندىرۋگە قوماقتى قارجى ءبولۋ ورىنسىز ەكەنىن ايتىپ جاتىر.

ايتا كەتۋ كەرەك، تۇركىستان وبلىسى رەسپۋبليكالىق بيۋدجەتتەن سۋبۆەنسيا الاتىن وڭىرلەردىڭ قاتارىنا جاتادى. وسىعان بايلانىستى قوعامدا بيۋدجەت قاراجاتىنىڭ ماقساتتى ءارى ءتيىمدى جۇمسالۋىنا قاتىستى ساۋالدار كوتەرىلۋدە.

قازىرگى ۋاقىتتا لوت جاريالانعان، تالقىلاۋ جانە ءوتىنىم قابىلداۋ كەزەڭدەرى بەلگىلەنگەن. ال بۇل باستامانىڭ قانشالىقتى ءتيىمدى ءارى نەگىزدى ەكەنى كونكۋرس ناتيجەلەرى مەن كورسەتىلەتىن قىزمەتتىڭ ناقتى مازمۇنى ايقىندالعاننان كەيىن بەلگىلى بولماق.